Shyǵys Qazaqstan oblysynda brakonerler men orman órtteri dron arqyly baqylanatyn bolady, dep habarlaidy QazAqparat.
ShQO orman sharýashylyǵy jáne janýarlar dúniesi inspektsiiasynyń málimetine súiensek, óńir boiynsha Qazaqstan aýmaǵyndaǵy orman qorynyń jartysynan astamy shoǵyrlanǵan.
Osy rette aǵashtardy zańsyz kesetinder men órttiń shyǵýy ormanǵa eleýli zalal keltirýde. Máselen, biylǵy mamyr aiynda bolǵan órtten memleketke keltirilgen shyǵyn mólsheri – 252 million teńgeden asqan.
«Endi 2022 jyldan bastap ushqyshsyz ushý apparaty inspektorlarǵa aýmaqty baqylaýǵa kómektesedi. Drondy paidalaný orman qory men erekshe qorǵalatyn tabiǵi aýmaqtardy kúzetýge, zańsyz aǵash kesý men órtterdiń aldyn alýǵa jáne janýarlar álemin baqylaýǵa múmkindik beredi», - dedi inspektsiia basshysy Dildábek Orazbaev.
