ShQO-da aiýlar úi sharýashylyǵyna shabýyl jasaityn jaǵdai jiilep ketken, - dep habarlaidy Tengrinews.kz agenttigi "Habar 24" telearnasyna silteme jasap.
Telearna málimetinshe, aimaqta aiýlardyń popýliatsiiasy ósip jatyr. Mamandardyń esebi boiynsha oblysta 3021 aiý bar bar. Maýsymda aiýlar Stepnoi aýyly mańyndaǵy omartalardy tórt ret qiratqan, Topiha aýylynda da osyndai jaǵdai bolǵan. Sarapshylar bul jas janýarlar ekenin, olar shamamen bir jasar ekenin anyqtaǵan.
Mamandardyń aitýynsha, aiýlar bir jerden tamaq alýdy ádetke ainaldyrsa, olardy ol jerden alastaý óte qiyn eken. Sondyqtan zardap shekken shyǵys qazaqstandyqtar múlki úshin ǵana emes, ózderiniń qaýipsizdigi úshin de alańdap otyr.
Turǵyndar janýardy óltirse, zań boiynsha jazalanatynyna bailanysty "olarǵa qarsy tura almaimyz ba?" dep alańdaidy.
"Bul - qylmystyq jaýapkershilik. Qazir omartashylar da, qalǵandary da qorǵansyz. Iaǵni, olar Amerikadaǵy siiaqty, óz menshigin qorǵap, aiýdy, tipti basqa janýardy óltirýge quqyǵy joq", - dedi Óskemen orman sharýashylyǵynyń ańshysy Sergei Osintsev.
