Shyǵys Qazaqstan oblysynda adasyp ketken 3 shopan qutqaryldy, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, 4 qarasha kúni saǵat 14.00 shamasynda Zaisan aýdanynda 3 shopannyń bir otar qoimen joǵalyp ketkeni týraly habar tústi. Belgili bolǵandai, tańerteń Birjan aýyldyq okrýgi aýmaǵyndaǵy qystaqtan shyqqan olar sol kúii qaityp oralmaǵan.
«Qutqarýshylar oqiǵa ornyna shuǵyl kelip, izdestirý sharalaryna kiristi. Nátijesinde, otar qoimen dalada adasyp júrgen shopandardyń biri tabyldy. 2 saǵattan keiin qutqarýshylarǵa ekinshi malshy jolyqty. Kóp uzamai úshinshi er adam da aman-esen tabylǵan», - delingen aqparatta.
TJD qyzmetkerleri shopandardy ótimdiligi joǵary «KÝNG» tehnikasymen qystaqqa jetkizdi. Olardyń densaýlyqtaryna eshqandai zaqym kelmegen.
