Shyǵys Qazaqstan oblysy Ulan aýdany Bozanbai aýylyndaǵy mektepte 72 oqýshynyń dene qyzýy kóterilip, ishi aýyrǵan. 38-i aýrýhanaǵa túsken. Olar mektep ashanasynda ýlanýy múmkin. Oqiǵaǵa qatysty Qylmystyq kodekstiń 304-bap 1-bóligi boiynsha ("Sanitariia qaǵidalary nemese gigienalyq normativterdi buzý") is qozǵaldy.
Oblystyq bilim basqarmasynyń málimetinshe, oqýshylardan "dene qyzýynyń kóterilýi, qusý men diareia" belgileri baiqalǵan.
"Aldyn ala ishek nemese enterovirýstyq infektsiiasy diagnozy qoiyldy. Tamaqty mektep ashanasyn jalǵa alǵan jeke kásipker uiymdastyrady" dep habarlady oblystyq basqarma.
Mektep 18 naýryzda jabylǵan. Bala sany 300-den aspaityn mektep oflain oqyp kelgen.
Ulan aýdany bilim berý bóliminiń jetekshisi Qýat Barysulynyń aitýynsha, ata-analardan shaǵym 17 naýryz tańerteńnen túse bastaǵan.
– Aldyńǵy kúni bastalǵan. Tańerteńnen túske deiin 16 adam boldy. Keiinirek bárin jaýyp, teksereiik dep jatqanda qalǵandary shyǵa bastady. Aqyrǵysy búgin saǵat 7-de tirkeldi... Olar ýlanǵan ba nemese enterovirýstyq infektsiia ma, ony SES-tiń analizderi anyqtaidy, – dedi ol Azattyq tilshisine.
Barysulynyń aitýynsha, qazir aýrýhanada jatqan 38 balanyń jaǵdaiy qalypty.
– Bir balanyń jaǵdaiy qalǵandaryna qaraǵanda sál aýyrlaý. Ony reanimatsiiaǵa jatqyzdy. Degenmen ómirine qaýip joq, – dedi ol.
"Baqylaýdy álsiretkeni úshin aýdandyq bilim bóliminiń basshysy men mektep direktory qatań tártiptik jaýapkershilikke tartyldy. Aýdan ákimdigi men bilim basqarmasy balalardyń ýlaný sebepteri men jaǵdailaryn zertteý boiynsha vedomstvoaralyq komissiia qurdy" dedi ShQO bilim berý basqarmasy.
