Foto: Senattyń bir top depýtaty Bas prokýrorǵa depýtattyq saýal joldap, sheteldikter asyrap alǵan balalardy taýyp berýdi surady, dep habarlaidy Sputnik Qazaqstan.
Depýtat Darhan Qydyráliniń aitýynsha, 2013-2019 jyldary sheteldikter Qazaqstannan 157 bala asyrap alǵan. Sońǵy tórt jylda taǵy bir bala syrtqa shyqty. 1999-2011 jyldary arasynda sheteldikter 8 805 balany asyrap alǵan. Olardyń 5 217-si qazir kámelet jasqa tolýyna bailanysty esepten shyǵaryldy. Al kámeletke tolmaǵan 3 588 bala týraly esep alynyp turady.
"Ókinishke qarai, esep bermeitinder de az emes. Máselen, Ońtústik Afrika eline ketken 30 baladan habar-oshar joq. Sol siiaqty AQSh-taǵy - 104, Belgiiadaǵy - 113, taǵy da basqa balanyń taǵdyryn bilmeimiz. Eń soraqysy, 1999 jylǵa deiin elimizden shetelge qansha balanyń ketkeni týraly múldem málimet joq", - dedi Qydyráli Cenattyń búgingi otyrysynda.
Senatordyń sózine qaraǵanda, 2014 jyly bas prokýratýra arnaiy tekseris júrgizgen. Jetim balalar men olardy asyrap alǵan azamattardyń biryńǵai júiesin qurýǵa qatysty usynys ta bolǵan.
"Bul tekseristiń nátijesi jáne qabyldanǵan sheshimderdiń oryndalý barysy týraly bizge beimálim. Aitalyq, Ońtústik Afrika, Keniia, Filippin, Meksika, Malta, Argentina siiaqty elderge ketken 120 bala baqylaýǵa alyndy ma? Biryńǵai málimetter júiesi quryldy ma? Jaýap kútetin saýaldar kóp", - dep atap kórsetti Qydyráli.
Senatorlar Úkimet basshysyna da depýtattyq saýal joldap, shetel asyp ketken balalar týraly málimetti jinaýdy talap etti. Ondai balalarǵa barlyq kómek te berilýi qajet.
