Elordada ótip jatqan «Mektep álemin ózgertetin - ustazdar» halyqaralyq konferentsiiasynda álemdegi barlyq pedagogtardy tolǵandyratyn máseleler talqylandy, dep habarlaidy QazAqparat.
Alqaly jiynda álemniń túkpir-túkpirinen jinalǵan eki myńnan astam pedagog bas qosty. Shetelden kelgen sarapshylar ózderiniń avtorlyq eńbekterin usynyp, zamanaýi bilim berý, bolashaq urpaqty oqytýda tiimdi tetikterdi paidalaný, pedagogika salasynyń keleli máseleleri taqyrybynda jazylǵan kitaptaryn tanystyrdy.
«Men eńbek jolymdy daryndy balalarǵa arnalǵan mektepte sabaq berýden bastadym. Jumys barysynda bilimdi urpaq tárbieleý úshin bilim júiesine ózgerister engizý kerek ekenin túsindim. Bilim berý – adamdar oilap tapqan protsess», - deidi Izraildegi Beit Berl kolledjiniń aǵa oqytýshysy Ioram Harpaz.
Ol muǵalim sóilep, oqýshynyń tyńdap otyrýy ótken ǵasyrlarda qalyp qoiǵan tásil ekenin aitty.
«Oqýshy alǵan bilimin emtihan kezinde aityp, odan keiin umytyp qalatyn kezeńnen de ótip kettik. Bul tásilmen oqytqan kezde «Jaman oqýshy oqyǵanyn emtihan tapsyrýǵa bir minýt qalǵanda umytyp qalady, jaqsy oqýshy oqyǵanyn emtihan tapsyrǵannan keiin bir minýt ótken soń umytady» degen ázil bolǵan. Aqyl-oi men midy áldenemen toltyrylýy tiis bos ydysqa teńeýge bolmaidy. Bilim berýdiń maqsaty – sol ydysty bilimmen toltyrý deidi. Bul da – eski júie. Biz oqýshylarǵa bilimniń emtihannan keiin esten shyǵaratyn nárse emes, ómirlik tájiribede qoldanylatyn qural ekenin úiretýimiz kerek», - deidi Ioram Harpaz.
Shara barysynda Kembridj ýniversitetiniń bilim berý innovatsiialary ortalyǵynyń direktory Kollin MakLaflin, Izrail Beit Berl kolledjiniń aǵa oqytýshysy Ioram Harpaz, KidZania halyqaralyq bilim berý baǵdarlamalarynyń direktory, balalar aldyndaǵy eńbegi úshin Britan imperiiasy ordeniniń qurmetti ofitseri Ger Graýs siiaqty belgili sarapshylar men ǵalymdar baiandama jasady.
Eske sala ketsek, elordada myńnan astam pedagogtyń qatysýymen «Nazarbaev Ziiatkerlik mektepteri» uiymdarynyń «Mektep álemin ózgertetin – ustazdar» halyqaralyq ǵylymi-tájiribelik konferentsiiasy ótti .
Onda QR Bilim jáne ǵylym vitse-ministri Sholpan Karinova Nazarbaev Ziiatkerlik mektepteriniń tájiribesi Qazaqstandaǵy jalpy bilim beretin mektepterge engiziletinin aitty .
Sondai-aq, «NZM» Derbes bilim berý uiymynyń basqarma tóraǵasy Kúlásh Shámshidinova qazirgi muǵalimder qandai bolýy kerektigin jetkizdi. Onyń sózinshe, «tek qana pándi bilý – jetkiliksiz, muǵalim aldymen ózine-ózi senýi tiis.
