Dimash Qudaibergenniń 63 jastaǵy fanaty Anita Rai Ýord ánshini izdep Jańa Zelandiiadan Aqtóbege arnaiy keldi, dep habarlaidy QazAqparat tilshisi.
Aqtóbe qalasyna Dimash Qudaibergenniń bir top fantop jetekshisi keldi. Olar ánshimen ońasha kezdesip, óz oilaryn aitty, kókeide júrgen suraǵyn qoidy. Olardyń arasynda Anita Rai Ýordtyń taǵdyry bólek. Jańa Zelendiiadan kelgen qariia qaterli isik aýrýyna shaldyqqan. Armany úshin dertiniń aýyrlyǵyna qaramai, Dimash Qudaibergenmen kezdesý úshin Aqtóbege jetken. Fanat qazaq tilin de úirenip júr.
"Búirektiń qaterli isigine shaldyǵyp, eki ret ota jasatqan edim. Tipti ómirden baz keship, tósekke tańyldym. Sol kezde iýtýbtan Dimash Qudaibergenniń Opera-2 ánin estip es jidym, basymdy kóterdim. Qaita turyp, ómir súrýge qushtarlyǵym artty", - dedi zeinetker Anita Rai Ýord.
Fanat Dimash Qudaibergenniń ánin 2017 jyldyń qyrkúieginde alǵash ret tyńdap, úsh ai boiy bar ánin áleýmettik jeliden qarap shyqqan.
"Maǵan 4 deńgeili búirektiń qaterli isigi degen diagnoz qoidy. Qiyn kezde maǵan kúsh pen dem bergen jalǵyz Dimash boldy. Ótken jyly kúzde Qytaida ótken kontsertine barǵym kelgen. Biraq turaqty em alyp, dári ishtim. Sáti osy joly túsip, Aqtóbeni kórdim. Bálkim, bul meniń sońǵy saparym shyǵar. Dimashty kórip, sheksiz qýandym", - dedi fanat.
Eske salsaq, Dimash Qudaibergen "Baqytty bala" baiqaýynda aqyldastar alqasynda otyr. Erteń baiqaý qorytyndylanyp, Dimash Qudaibergen gala kontsertte án aitady.
