Týristik operatorlarǵa árbir sheteldik týrist úshin 15 myń teńge sýbsidiia tólenbek. Ol úshin sheteldik el aýmaǵynda keminde 5 kún demalýy kerek, dep habarlaidy QazAqparat.
Bul týraly Týrizm indýstriiasy komitetiniń tóraǵasy Dastan Ryspekov ortalyq kommýnikatsilar qyzmetinde ótken brifingide aitty.
«Ózderińiz biletindei, búgingi tańda qazaqstandyq týroperatorlardyń jumysy syrtqy týrizmge baǵyttalǵan. Budan bylai týroperatorlardy ishten syrtqa emes, syrttan ishke týrist tartýǵa yntalandyramyz. Ol úshin halyqaralyq tájiribe negizinde elge ákelgen árbir sheteldik týrist úshin týroperatorlarǵa 15 000 teńge sýbsidiia tólenedi. Ol týrist Qazaqstan aýmaǵynda keminde 5 kún bolýy kerek. Sonda týristik operatorlar týristen de aqsha tabady, memleketten de sýbsidiia alady. Mysaly, týroperator Qazaqstanǵa týrpaket quramynda 1 000 sheteldikti ákelse, ol memleketten 15 mln teńge alady», - dedi Dastan Ryspekov.
Komitet tóraǵasy týroperatorlar bul qarajatty sheteldik áriptestermen óz áriptestigin odan ári nyǵaitýǵa baǵyttai alatynyn túsindirdi.
«Bul qarajatty olar elimizge týrist tartý jóninde kelisim jasasý úshin halyqaralyq kórmeler uiymdastyrýǵa, ózderi basqa kórmelerge qatysýǵa paidalana alady», - dedi komitet basshysy.
