Sheteldegi qazaqstandyqtar úshin eGov.kz jańa 5 qyzmet qoljetimdi, dep habarlaidy "Ult aqparat" QR Syrtqy ister ministrliginiń baspasóz qyzmetine silteme jasap.
Elden tys jerlerde turatyn Qazaqstan azamattary endi eGov.kz internet-portaly arqyly nekege turýǵa nemese ony buzýǵa, týýdy, qaitys bolýdy tirkeýge jáne atyn, tegin, ákesiniń atyn aýystyrýǵa qujattardy tapsyra alady.
Aktilik jazbanyń tirkelgeni týraly Qazaqstannyń tiisti shet elderdegi mekemesinen habarlama alǵan kezde ótinish berýshi daiyn kýálikti Qazaqstannyń shet elderdegi elshiliginen nemese konsýldyǵynan alýy qajet. Búgingi tańda bul múmkindik álemniń 20-dan astam núktesinde bar.
Qyzmetterdi «Ulttyq aqparattyq tehnologiialar» AQ men Tsifrlyq damý, innovatsiialar, aeroǵarysh ónerkásibi ministrligi Syrtqy ister ministrligimen jáne Ádilet ministrligimen birlesip iske asyrdy.
eGov.kz. portalynyń «Otbasy» bóliminde neke qiiýdy nemese ony buzýdy memlekettik tirkeý úshin tiisti qyzmetti tabý, qajetti joldardy toltyrý jáne konsýldyq alym tólemi týraly chekti júkteý, budan ári ETsQ nemese SMS-parol arqyly suraý salýǵa qol qoiý qajet. Osydan keiin erli-zaiyptylardyń biriniń jeke kabinetine ótinimdi kelisý qajettiligi týraly habarlama jiberiledi. Ol qajetti joldardy toltyrady jáne suraýǵa qol qoiady. Qyzmet kórsetý merzimi - 1 ai.
Shetelde balanyń týýyn tirkeý úshin paidalanýshy qajetti joldardy toltyrýy, suralǵan qujattardy, konsýldyq alymdy tóleý týraly chekti júkteýi jáne ótinishke qol qoiýy qajet. Qyzmet kórsetý merzimi - 3 jumys kúni. Atyn, tegin, ákesiniń atyn ózgertý úshin dál osyndai áreketterdi oryndaýyńyz kerek, biraq merzimi 30 kúntizbelik kúndi quraidy.
Qaitys bolýdy tirkeý kezinde qaitys bolǵan adamnyń JSN-in kórsetý, qajetti joldardy toltyrý jáne suraý salýǵa qol qoiý qajet. Qyzmet 1 jumys kúni ishinde kórsetiledi.
