«Uly dala elinen» jobasy aiasynda «Halyq qazynasy» memlekettik óner ujymy sheteldegi qandastarǵa arnalǵan «Qazaǵym-ai» atty onlain kontsertin usynady, dep habarlaidy "Ult aqparat".
Qazaq diasporasyna rýhani qoldaý kórsetý jáne sheteldegi qandastarmen bailanysty nyǵaitý maqsatynda ótetin kontsertti Dúniejúzi qazaqtarynyń qaýymdastyǵy, «Otandastar qory» KEAQ jáne «Qazaqkontsert» uiymy birge uiymdastyryp otyr.
Bul joba 2019 jyldan beri QR Aqparat jáne qoǵamdyq damý ministrliginiń tapsyrmasymen júzege asyrylyp keledi.
«27 qyrkúiek kúni saǵat 21.00-de (Nur-Sultan ýaqyty boiynsha) tikelei efirde ótetin onlain kontsertte dástúrli án-kúi óneriniń belgili sańlaqtary óner kórsetedi. Onlain kontsert «Otandastar qorynyń» Otandastar channel YouTube arnasynda kórsetilip, barshaǵa qoljetimdi bolmaq», - dep atap ótedi «Qazaqkontsert» uiymy.
Tikelei efirde Qazaqstannyń eńbek sińirgen qairatkerleri Janǵali Júzbai, Erlan Rysqali, Erbolat Shaldybekov, Klara Tólenbaeva, Ardaq Balajanova jáne halyqaralyq baiqaýlardyń laýreattary Asqar Muqiiat, Aqerke Tájibaeva, Venera Tabys óner kórsetedi.
Ártister kópshilik súiip tyńdaityn ulttyq mýzykalyq týyndylar men jańa mýzykalyq kompozitsiialardy oryndaidy.
