«Otandastar qory» KEAQ vitse-prezidenti Maǵaýiia Sarbasov shetelden keletin qazaq jastaryna arnalǵan oqý kvotasy men granttar týraly baiandady, dep habarlaidy QazAqparat.
«Sheteldegi qandas talapkerlerge memlekettik granttan arnaiy kvota bólinedi. Olarǵa bólinetin kvota sany 2 paiyzdan 4 paiyzǵa ulǵaidy. Sońǵy 3 jylda daiyndyq bólimine 3500 grant bólindi. Oǵan 3055 jas qandasymyz tústi. 2020 jyly pandemiiaǵa bailanysty qordyń tikelei usynysymen jáne QR Bilim jáne ǵylym ministrliginiń qoldaýymen sheteldegi otandastarymyz Ulttyq birińǵai testileýdi onlain tapsyrý quqyǵyna ie boldy. Biyl da sol tájiribege súienip, UBT onlain formatta ótti. Onyń nátijesi áli jariialanǵan joq», - dedi M. Sarbasov Ortalyq kommýnikatsiialar qyzmetinde ótken baspasóz máslihatynda.
Memlekettik kvota aiasynda sońǵy 5 jylda 3643 talapker UBT-dan shektik bal jinap, joǵarǵy oqý oryndaryna túsken. Barlyq sheteldik stýdentterge iaǵni, qandastarǵa jataqhana mindetti túrde beriledi.
Sonymen qatar kolledjde oqý úshin de memleket tarapynan 4% kvota qarastyrylǵan. 2020 jyly 540 qandasymyz qujat tapsyryp, bári de grant iegeri atanǵan.
«2020 jyldan bastap «Otandastar Qory» usynysymen «Nazarbaev ýniversitetine túsý úshin qandastarǵa Abai atyndaǵy granttar berile bastady. Oǵan AQSh, Kanada, Qytai, Ózbekstan, Mońǵoliia qatarly memleketterden 56 úmitker qatysyp, 13-i grant iegeri atandy. Qazirgi ýaqytta olar bilim alyp jatyr.
Sondai-aq, «Otandastar qory» KEAQ men otandyq joǵary oqý oryndary birigip «Otandastar» grantyn ázirleýde. Búgingi tańda «Qainar» ýniversiteti, «Qorqyt Ata» atyndaǵy memlekettik ýniversitetimen birlesip, ataýly granttar bólý máselesi qaralyp jatyr», - deidi M. Sarbasov.
