Shetelde ómir súretin etnikalyq qazaqtarǵa ruqsat qujattarynsyz Qazaqstan aýmaǵynda jumys isteý múmkindigi berilmek. Bul týraly Zań jobalaý qyzmeti máseleleri jónindegi vedomstvoaralyq komissiianyń kezekti otyrysynda QR Eńbek jáne halyqty áleýmettik qorǵaý vitse-ministri Nurjan Áltaev málim etti, dep habarlaidy QazAqparat tilshisi.
Atap aitqanda, komissiia otyrysynda «Qazaqstan Respýblikasynyń keibir zańnamalyq aktilerine kóshi-qon protsesterin retteý máseleleri boiynsha ózgerister men tolyqtyrýlar engizý týraly» zań jobasynyń tujyrymdamasy qarastyryldy.
«Shetelde turatyn etnikalyq qazaqtarǵa tiisti ruqsatsyz Qazaqstan Respýblikasynda ýaqytsha eńbek etý múmkindigin berý usynylady. Oralmandar men qonys aýdarýshylardy qabyldaýdyń óńirlik kvotasyn anyqtaý boiynsha quzyretti qaita bólip, bul qyzmetti migratsiia máseleleri boiynsha ókiletti organǵa bekitý eskerilgen. Qazirgi kezde osy quzyret Úkimetke tiesili», - dedi vitse-ministr.
Eńbek ministrligi oralman mártebesine qaramastan, etnikalyq qazaqtarǵa jeńildetilgen tártipte QR azamattyǵyn berý quqyǵyn eskerýdi usynyp otyr.
«Etnikalyq qazaqtar niet bildirse, turaqty qonystanýǵa jáne Qazaqstan azamattyǵyn ielenýge ruqsatty alýǵa onyń ótinishhatyn qatar qarastyrý múmkindigi usynylady. Búginde adamdar dál sol paketpen ókiletti memorgandarǵa eki ret barýy tiis», - dedi ol.
Sonymen qatar, vedomstvo oralman mártebesin nemese turaqty qonystanýǵa ruqsat pen QR azamattyǵyn alýǵa úmitker adamdardyń ultyn anyqtaý tetigin qaita qarastyrýdy usynyp otyr.
