Shetelde 5 millionnan astam etnikalyq qazaq turady. Bul týraly Dúniejúzi qazaqtary qaýymdastyǵynyń baspasóz hatshysy Syrymbek Tóleýuly málim etti, dep habarlaidy "Ult aqparat".
«Ǵalymdar, ár ǵylymi zertteý ortalyǵy túrli málimetterdi keltirip jatyr. Keibir ortalyqtar sheteldegi etnikalyq qazaqtar sany 7 million dese, basqalary ózge málimetterdi jariialaýda. Bizdegi málimetke qaraǵanda, iaǵni resmi derek boiynsha osydan birneshe jyl buryn 5 million bolǵan. Qazirgi kezde sheteldegi etnikalyq qazaqtar 5 millionnan asty», - dedi Syrymbek Tóleýuly.
Dúniejúzi qazaqtary qaýymdastyǵynyń málimetinshe, resmi derek boiynsha etnikalyq qazaqtar sany 6 millionǵa jetken joq.
«Qandastardyń kóbisi Ózbekstanda, Qytaida, Reseide jáne Mońǵoliiada ómir súrip jatyr. Túrkiia men Eýropada da bar, biraq aitarlyqtai kóp emes», - dedi S. Tóleýuly.
