«Rýhani jańǵyrý» baǵdarlamasynyń bir jyldyǵy aiasynda "Shetel stýdentteriniń Qazaqstanǵa kózqarasy" atty telekópir ótti. Qazaq mádenietine, tiline erekshe qyzyǵýshylyq tanytyp júrgen shetel stýdentteriniń pikirleri tyńdaldy.
Italiiadan kelgen Dario Kýagli: «Men Italiiadan keldim. Óz elimde júrgende Qazaqstan jaily az bildim. Ózime tanys bolmaǵan jańa memleketti jaqynyraq bilý úshin osynda keldim. Bilimimdi jalǵastyratyn ýniversitet retinde QazUÝ-dy tańdadym. Mundaǵy bilim berý júiesi men oqytýshylar quramy kóńilimnen shyqty. Sondai-aq QR Prezidentiniń «Bolashaqqa baǵdar: rýhani jańǵyrý» baǵdarlamasyn bir aýyzdan qoldaimyn», - dedi Dario Kýagli.
Tokýro Oýchi esimdi japon jigiti otanynda Alpamys batyr jáne Manas epostyq dastandaryn óz ana tilinde oqyp, qazaq pen qyrǵyzdyń dástúri men mádenietine qyzyqqanyn aitady.
Takýro qazir ál-Farabi atyndaǵy QazUÝ-da joǵarǵy oqý ornyna deiingi bilim berý fakýltetinde qazaq tilin meńgerip jatyr.
– Men Japoniiada júrgende qazaq halqynyń «Alpamys batyr, qyrǵyz halqynyń «Manas» epostyq jyrlaryn japon tilinde oqydym. Bul epostyq jyrlar meni qatty qyzyqtyrdy. Japon tilinde basqa epostyq jyrlar joq eken. Sondyqtan ádebiettiń osy janryn zerttegim keldi. Qazaqstanǵa kelip, ál-Farabi atyndaǵy QazUÝ-ge oqýǵa túsýimniń basty sebebi de osy", - deidi Takýro.
– Qazir osy oqý ornynda qazaq tilin meńgerip jatyrmyn. Qazaq tilin úirenýmen qatar, osy eldiń mádenietimen, tarihymen, salt-dástúrimen tanystym. Ásirese, Aisha bibi men Qarahan baba jaiyndaǵy ańyzdy oqyǵannan keiin ekeýiniń arasyndaǵy mahabbat oqiǵasy meni qatty qyzyqtyrdy.
«Qazaqstan shetel stýdentteriniń kózqarasymen» atty telekópirge memleketimizdiń 7 ýniversitetiniń qatysýshylary qatysty. L.Gýmilev atyndaǵy Eýraziia Ulttyq ýniversiteti, S. Amanjolov atyndaǵy Shyǵys Qazaqstan ýniversiteti, M. Ótemisov atyndaǵy Batys Qazaqstan ýniversiteti, M. Qozybaev atyndaǵy Soltústik Qazaqstan ýniversiteti, M. Áýezov atyndaǵy Ońtústik Qazaqstan ýniversiteti , Qazaq memlekettik qyzdar ýniversiteti onlain arnaǵa shyǵyp, pikir almasty.
