Qazaqstandaǵy qaiǵyly oqiǵalar kezinde kóptegen adamnyń qaza bolýyna bailanysty Qasym-Jomart Toqaevtyń atyna shet memleketterdiń basshylarynan, halyqaralyq qurylymdardyń ókilderinen kóńil aitý jedelhattary kelip jatyr, dep habarlaidy Aqorda.
QHR Tóraǵasy Si Tszinpin jedelhatynda Qasym-Jomart Toqaevtyń memleket úshin sheshýshi sátte jaǵdaidy jedel óz baqylaýyna alyp, batyl ári naqty sharalar qabyldaǵanyn jazǵan.
– Osydan Sizdiń saiasatker jáne elińiz ben halqyńyzdyń aldynda zor jaýapkershilik arqalaǵan tulǵa retindegi erligińiz kórinedi. Men muny joǵary baǵalaimyn! Qytai tarapy Qazaqstannyń turaqtylyǵyna nuqsan keltiretin, onyń qaýipsizdigine qaýip tóndiretin, Qazaqstan halqynyń tynyshtyǵyn buzatyn kez kelgen kúshterge jáne Qazaqstanda sanaly túrde haos týǵyzyp, «túrli-tústi revoliýtsiia» jasaityn syrtqy kúshterge batyl qarsy shyǵady. Qazaqstan men Qytai arasyndaǵy dostyqqa syna qaǵýǵa jáne ekijaqty yntymaqtastyqqa kedergi keltirýge tyrysatyn kez kelgen áreketke batyl qarsy turady, – delingen Qytai Tóraǵasynyń jedelhatynda.
Ózbekstan Prezidenti Shavkat Mirziioev óziniń hatynda Qasym-Jomart Toqaevqa jáne Qazaqstan halqyna kóńil aityp, elimizdegi beibitshilikti saqtaý jolynda qaza tapqan qaisar ulandardyń jaqyndary men týystarynyń qaiǵysyna ortaqtasatyn aitqan.
– Baýyrlas Qazaqstanda beibitshilik pen turaqtylyqty qamtamasyz etý jolyndaǵy Sizdiń batyl kúsh-jigerińizdi tolyq qoldaitynymyzdy taǵy da naqtylaǵym keledi, – delingen Ózbekstan kóshbasshysynyń jedelhatynda.
Qyrǵyzstan Prezidenti Sadyr Japarov joldaǵan jedelhatynda Qazaqstanda bolǵan qaiǵyly oqiǵalardy zor kúizelispen qabyldaǵanyn atap ótip, Qyrǵyzstan halqynyń jáne jeke óziniń atynan Memleket basshysy Qasym-Jomart Toqaevqa jáne qazaq halqyna kóńil aitqan.
– Myzǵymas dostyq, tatý kórshilik jáne ózara syilastyqqa negizdelgen halyqtarymyzdyń kóp ǵasyrlyq ortaq tarihi, rýhani jáne mádeni bailanystaryn eskere otyryp, Qyrǵyzstan Qazaqstan Respýblikasyn qashanda niettes, senimdi kórshi ári strategiialyq áriptes retinde qoldaidy, – delingen Qyrǵyzstan basshysynyń jedelhatynda.
Belarýs Prezidenti Aleksandr Lýkashenko kóptegen adamnyń qurban bolýyna jáne ǵimarattardyń qiraýyna ákep soqtyrǵan sodyrlar tobynyń elimizge jasaǵan shabýyly halyqaralyq terrorizmniń álemge zor qaýip tóndiretinin taǵy da kórsetti dep jazǵan.
– Ekstremisterdiń túpki maqsaty – kópultty Qazaqstandaǵy jaǵdaidy turaqsyzdandyrý, elde haos ornatyp, konstitýtsiiaǵa qarsy tóńkeris jasaý jáne saiasi baǵdardy ózgertý úshin baýyrlar arasynda soǵys otyn órshitý ekeni aiqyn, – dep jazdy Belarýs basshysy.
Tájikstan Prezidenti Emomali Rahmon jáne Túrikmenstan Prezidenti Gýrbangýly Berdimuhamedov, sondai-aq BUU Órkenietter Aliansynyń Joǵarǵy Ókili Migel Anhel Moratinos jáne basqa da tulǵalar qoldaý bildirip, kóńil aitty.
Jedelhattar áli de kelip túsýde.
