sýret ashyq derekkózden alyndy
Taldyqorǵandyq jýrnalist Sandýǵash Dúisenova Qaz365.kz tilshisine 8 saǵat izoliatorda bolǵanda qandai qorlyq kórgenin aityp berdi.
«Tergeýshi meni 11 tamyz kúni keshke 17:00-ge shaqyrǵan. Oiymda eshteńe joq, bara saldym. Tergeýshi ústimnen aryz túskenin aityp, suraqtary baryn jetkizdi. Aryz túsirgen, osydan 1,5 jyl buryn qasana adam óltirip, qashyp júrgen adam týraly jazǵanmyn. Sol kezde qylmysker týraly ózimniń Instagram paraqshamda jazǵan edim. Eger bul adam týraly aqparat bolyp jatsa, politsiiaǵa habarlasyńyzdar degen saryndaǵy post salǵanmyn. Keiin Qyzylaǵashqa baryp, ólgen adamnyń úiine baryp, kóńil aityp, video túsirgenim bar. Qylmysker qolynda 2 jasar balasy bar adamdy atqan. Sol oqtan bala da jaralanǵan. Bir aptadan keiin tabyldy dedi. Keiin qaitys bolǵan er azamattyń otbasyna halyq bop jylý jinap, úi alyp berdik. Meniń bar aiybym sol adamnyń jeke sáikestendirý nómiri jazylǵan qaǵazdy salýym ǵoi. Endi túrmede otyrǵan adam Jetisý oblysynyń prokýrorynyń atyna «jeke ómirime qol suqty, ústinen is qozǵaýyńyzdy suraimyn» dep aryz jazǵan. 147-bappen is qozǵady», - deidi Sandýǵash Dúisenova.
Ol politsiia bóliminde tergeýshi taǵylǵan aiyp aýyr ekenin aityp, qamaýǵa alǵanyn aitty. Sandýǵash óz kezeginde eshqaida qashyp ketpeitinin, ishimdik, esirtkige áýestigi joq ekenin aityp túsindirgenimen, politsiialar kónbei qamaýǵa alǵan. Sosyn tintý jasap, sheshindirgen kórinedi.
«Kýáger eki áiel, kriminalist qyz, tergeýshi áiel keldi. Sol jerde sheshindirdi. Kriminalist bir videokameramen túsirdi deńiz. Tergeýshiniń kabinetinde jelke jaǵymda taǵy bir úlken kamera turdy. Bul politsiia departamenti basshysyna qoiylǵan kamera bolsa kerek. Oblystaǵy politsiia basshysy – er adam. Meniń bala-shaǵam, nemerelerim, kúieý balalarym bar. 55 jastaǵy áielmin. Biraq soǵan qaramastan, osylai sheshindirip, qorlyq kórsetti. Bul video basqa jaqqa tarap ketpesine kim kepil? Erteń video tarasa, myna Sandýǵashtyń sheshinip tastaǵany nesi dep bireý aitýy múmkin ǵoi. Keiin narkologiiaǵa, sosyn araq ishken-ishpegenin tekseretin bólimge apardy. Ish kiimderimdi tartyp aldy. Tóstartqyshty berse, men asylyp qalady ekenmin. Tóstartqyshsyz er adamdardyń aldynda júrýime týra keldi. Masqara jaǵdai. Men biraq aitqandarynyń bárin istedim. Qarsylyq tanytpadym. Namysqa tyrystym. Sóitip, ýaqytsha ustaý izoliatoryna qamaýǵa aldy. Kameraǵa kontslagerdegidei keýdemdi qolymmen jaýyp kirdim. Jigitter uialdy ma, áiteýir, durys matras, kórpe-tósegin berdi. Al túngi 00:40-ta úiime jiberdi. Endi úige kelip, osynsha qorlyq kórgenim namysyma tiip jatyr», - deidi jýrnalist.
Onyń advokaty Ilmira Nazyrova endi prokýratýraǵa shaǵym túsirip, sol kúni toltyrylǵan barlyq protokol, qujattardy suratpaqshy.
Aita keteiik, Sandýǵash Dúisenova «Jeke ómirge qolsuqpaý jáne derbes derek pen olardy qorǵaý týraly zańnamany buzý» (147-bap) baby boiynsha aiyptalyp jatyr. Eshqaida ketpeý týraly qolhatpen bosap shyqqan.
