Qazaq ádebieti qara jamyldy. Kórnekti qalamger Sherhan Murtaza dúnie saldy. Bul týraly Jambyl oblystyq ishki saiasat basqarmasynyń basshysy Berik Ýáli habarlady.
Jazýshy jaqynda ǵana 86 jasqa tolǵan bolatyn. Qalamgerdiń aýyr qazasyna orai otbasyna, aǵaiyn-týystaryna qaiǵyra kóńil aitamyz.
Aita ketsek, Sherhan Murtaza 1932 jyly 28 qyrkúiekte Jambyl oblysy, Jýaly aýdany, Myńbulaq aýylynda dúniege kelgen. 1955 jyly M.V.Lomonosov atyndaǵy Máskeý memlekettik ýniversitetiniń jýrnalistika fakýltetin támamdaǵan.
«Leninshil jas» (qazirgi «Jas Alash») gazetiniń, «Sotsialistik Qazaqstan» (qazirgi «Egemen Qazaqstan») gazetiniń tilshisi, ádebi qyzmetkeri boldy. 1963-1970 jyldary «Leninshil jas» gazetiniń redaktory.
Sodan keiingi ýaqytta «Jazýshy» baspasynyń, «Jalyn» almanahynyń, «Juldyz» jýrnalynyń bas redaktory, Qazaqstan Jazýshylar odaǵy basqarmasynyń ekinshi hatshysy, «Qazaq ádebieti» gazetiniń bas redaktory ári Qazaqstan Jazýshylar odaǵy basqarmasynyń hatshysy.
1989-1992 jyldary «Egemen Qazaqstan» gazetiniń bas redaktory, 1992–1994 jyldary Qazaqstan Respýblikasy memlekettik teleradio kompaniiasynyń tóraǵasy bolyp istedi. QR Parlamentiniń Májilis depýtaty bolǵan.
Jazýshynyń ár jyldary «Tabylǵan teńiz» (1963), «Belgisiz soldattyń balasy» (1969), «Ahmetjannyń anty» (1973), «Myltyqsyz maidan» (1977) povesteri, «41-jylǵy kelinshek» (1972), «Internat nany» (1974) áńgimeleri, «Qara marjan» (1977), bes kitaptan turatyn «Qyzyl jebe», «Ai men Aisha» (1999) romandary, shyǵarmalarynyń tórt tomdyǵy (1990-2000), shyǵarmalarynyń 6 tomdyǵy, tańdamaly shyǵarmalarynyń 7 tomdyǵy, «Elim, saǵan aitam, Elbasy, sen de tyńda» (K. Smaiylovpen birge) (1998), «Bir kem dúnie» (2008) kitaptary jaryq kórgen. Onyń shyǵarmalary álemniń birneshe tiline aýdarylǵan.
Qazaq tiline G.H.Andersenniń áńgimelerin, vengr halyq ertegilerin, Sh.Aitmatovtyń «Botagóz», «Qosh bol, Gúlsary», «Teńiz jaǵalai júgirgen tarǵyl tóbet», «Borandy beket» týyndylaryn; Mustai Kárimniń «Bizdiń úidiń qýanyshy» povesin, E.Erskinniń «Marykchan balalary» romanyn, L.Laginniń «Hottabych qart» povesin tárjimalady. «Áziza» pesasy Mádeniet jáne aqparat ministrliginiń grantyn jeńip aldy.
«Qara marjan» romany úshin 1978 jyly Qazaq KSR Memlekettik syilyǵyn aldy. Qazaq KSR-niń eńbek sińirgen mádeniet qyzmetkeri, Qazaqstannyń Halyq jazýshysy. «Qurmet belgisi», «Otan (1999) ordenderimen, medaldarmen marapattalǵan. PEN-klýb syilyǵynyń iegeri (2003).
