Úkimet basshysy memlekettik satyp alýlarǵa importtyq avtokólikterge 2 jyl merzimge tyiym salý týraly Qaýlyǵa qol qoidy. Bul týraly «QazAvtoÓnerkásip» avtomobil salasy kásiporyndarynyń odaǵy habarlaidy.
Odaqtyń málimeti boiynsha, mundai qadam otandyq naryqtyń múddesin qorǵaý úshin jasalyp otyr.
«QR «Memlekettik satyp alý týraly» Zańynyń 14-babyna sáikes, eldiń ishki naryǵyn qorǵaý jáne ulttyq ekonomikany damytý maqsatynda Qazaqstan Respýblikasynyń Úkimeti Qaýly etedi:
1. Memlekettik satyp alýdy júzege asyrý kezinde Qazaqstan Respýblikasynyń aýmaǵynda óndirilmeitin taýarlardy qospaǵanda, shet memleketterden shyǵarylatyn taýarlardy ulttyq rejimnen alyp qoiý belgilensin.
2. «CT-KZ» nysanyndaǵy taýardyń shyǵý tegi týraly sertifikaty bar Qazaqstan Respýblikasynyń zańdy tulǵasy óndirgen taýarlar memlekettik satyp alýǵa qatysýǵa jiberilsin» delingen Qaýly mátininde.
Ulttyq rejimnen alynǵan taýarlar tizimine jeńil avtokólikter enip otyr.
«Tiisti qaýly kúshine endi jáne eki jyl boiy áreket etedi. Qujat «ST-KZ» nysanyndaǵy sertifikattyń mindetti talaby boiynsha tek otandyq óndirýshilerden ǵana memlekettik satyp alýdy jáne jalǵa alýdy júzege asyrýdy uiǵarady», - deidi avtoóndirýshiler odaǵynyń strategiialyq josparlaý jónindegi direktory Artýr Miskarian.
Qaýlyny QR Indýstriia jáne infraqurylymdyq damý ministrligi ázirlegen.
«Byltyr otandyq avtozaýyttar shyǵarǵan ónimniń 11 paiyzǵa jýyǵyn memlekettik qurylymdar satyp alǵan. Konkýrsqa qatysý úshin «ST-KZ» sertifikatynyń basty talap retinde qoiylýy memlekettik satyp alý rásimin neǵurlym ashyq etedi», - deidi Arýtr Miskarian.
