Parlament Májilisiniń depýtaty Janarbek Áshimjan shekarashylardyń aýyr turmysyn synǵa alyp, Qorǵanys ministri Rýslan Jaqsylykovqa saýal joldady, dep habarlaidy QazAqparat.
«Shekara – Táýelsizdiktiń basty simvoly. Qazaqstan barlyq tarappen qurlyqtaǵy jáne teńizdegi shekara syzyǵyn halyqaralyq shartpen bekitip aldy. Delimitatsiia, demarkatsiia protsesi sátti júzege asty. Alaida sońǵy ýaqyttaǵy álemdik geosaiasi keńistiktegi túrli qubylystar kim-kimdi de oilandyrmai qoimaidy. Osy oraida, men Úkimet nazaryn elimizdegi shekara bólimshelerine aýdarǵym keledi», - dedi Áshimjan Májilistiń jalpy otyrysynda.
Taiaýda depýtat Almaty oblysy Panfilov aýdanyndaǵy Shekara basqarmasy, Narynqol-Uiǵyr aýdanyndaǵy «Raiymbek» shekara zastavasy, Kegen aýdanyndaǵy «Saty», «Rabat» shekara bólimshelerin bastan aiaq aralap, sarbazdardyń áleýmettik jaǵdailarymen tanysqan. Oǵan qosa, «Qastek», «Jambyl», «Qarǵaly», «Qaskelen», «Alma arasan» shekara bólimsheleri bar.
Onyń aitýynsha, shekarashylardyń turmystyq-áleýmettik jaǵdaiy syn kótermeidi. Arnaiy maqsattaǵy nysandardyń deni kúirep tur. Shekarashylar turatyn ǵimarattar kúrdeli jóndeýdi, kógildir otynmen qamtýdy, jaryqtandyrýdy, beinebaqylaý men elektr júiesin jabdyqtaýdy talap etedi.
«Mańyzdy nysandardy salý men kúrdeli jóndeý boiynsha Almaty oblysy ákimdigimen ortaq kelisim bar. Shekara bólimsheleriniń infraqurylymyn retteý jónindegi Jol kartasyna da engen, biraq másele áli sheshimin tappai otyr. Al sońǵy 5 jylda qaýipsizdik salasyna bólingen qarjyda esep joq. Ashy da bolsa aitaiyn, «Saty», «Rabat» zastavasynyń shekarashylary 90-jyldardaǵy eski monsha men esik-terezesi ańǵal-sańǵal balabaqshada turyp jatyr. Panfilov aýdanyndaǵy shekara basqarmasy 1892 jyly salynǵan ǵimaratqa ornalasqan. Shonjydaǵy «Raiymbek» zastavasynyń áskerileri turatyn turǵyn-úiler men sportzal, kitaphana, májilis zalynyń tóbesinen sý aǵyp, qabyrǵalary setinep tur. Túrli qarý-jaraq saqtalǵan shekara zastavalarynyń qorshaýlaryn jaiaý adam japyryp, atty adam opyryp ótedi. Osydan keiin shekaralyq óńirlerge otbasymen baryp qyzmet etip júrgen ofitserlik quram men áskeri boryshyn óteitinderge «shekaramyzdy qas qaqpai kúzetińder» dep qalai talap etemiz? Bolashaq shekarashylardy qalai yntalandyramyz?», - dedi Janarbek Áshimjan.
Osy oraida, depýtat jedeldetip myna sharalardy qolǵa alýdy usyndy.
«Birinshi, memleketimizdiń qurlyqtaǵy jáne teńizdegi barlyq shekara qyzmetteriniń materialdyq-tehnikalyq bazasy men áleýmettik nysandaryn arnaiy Úkimettik komissiia shyǵaryp tekserýdi; Ekinshi, mektepterde otansúigishtikti nasihattaityn baǵdarlamalardy kúsheitýdi; Úshinshi, taý asyp, tas basyp júrgen Almaty oblysyndaǵy shekarashylardyń áleýmettik-turmystyq jaǵdaiyn jedeldetip sheshýdi usynamyn», - dedi Májilis depýtaty.
