Qazaqstannyń ońtústik shekarasy mańynda ornalasqan 72 eldi mekenge otandyq radio habar tarata bastady, dep habarlaidy "Ult aqparat" QR Aqparat jáne kommýnikatsiialar ministri Dáýren Abaevqa silteme jasap.
D.Abaev ministrlik qurylǵan ýaqyttan beri shekaralyq aimaqtarda otandyq radiohabar taratý máselesin sheshý týraly ótinishter kóptep túskenin atap ótti.
«Bul máseleni sheshýge biraz ýaqyt kerek edi. Biylǵy jyldyń maýsym aiynda Túrkistan oblysy Túlkibas pen Sairam aýdandarynyń 72 eldi mekeninde, sondai-aq Arys qalasynda «Shalqar» radiosynyń taratylymyn keńeitý jumystary tolyq aiaqtaldy. Bul alǵashqy qadamdardyń biri ǵana», - dep jazdy ministr Feisbýktegi jeke paraqshasynda.
D. Abaevtyń habarlaýynsha, ministrlik ózge shekaralyq aimaqtarda otandyq radiony sóiletý jumystaryn jalǵastyra beredi.
