Foto: pexels.com
Joǵary bilimi bar mamandar qarapaiym turmystyq jaǵdaidyń bolmaýyna bailanysty aýyldyq jerlerge barmaidy. Bul týraly Premer-Ministr atyna depýtattyq saýal joldaǵan senator Olga Býlavkina aitty, dep habarlaidy Kazinform agenttigi.
Senator depýtattyq saýalynda Qazaqstannyń shekara mańyndaǵy óńirleriniń infraqurylymyn damytý máselelerin kóterdi. Aitýynsha, Shyǵys Qazaqstan oblysynyń 36 myń halqy bar Zaisan aýdanynda aýdandyq emhana salý qajet, al Katonqaraǵai aýdanynda meditsinalyq pýnkt ǵimaraty aýyldyq klýbta ornalasqan.
«Katonqaraǵai aýdanynda veterinariia salasyndaǵy mamandardyń jyl saiyn 25-30 paiyzǵa deiin kóship ketýi baiqalyp otyr. Osy saladaǵy qyzmetkerlerdiń bir bóliginde arnaiy bilim joq. Bul jaǵdai shalǵaidaǵy ár aýylda baiqalady. Joǵary bilimi bar mamandar qarapaiym turmystyq jaǵdaidyń bolmaýyna bailanysty aýyldyq jerlerge barmaidy», – dedi Olga Býlavkina.
Depýtat osyǵan bailanysty Úkimet basshysy Álihan Smaiylovqa jańadan qurylǵan ákimshilik aýmaqtardy ońaltýdyń jol kartasyn ázirleýdi jáne tiisti qarjysy bekitilgen ári naqty merzimderi kórsetilgen sharalardy iske asyrýdy usyndy.
«Sonymen qatar kásipkerlik qyzmet salasynda erekshe retteý saiasatyn qalyptastyrý maqsatynda kásipkerler júktemesin azaitýǵa baǵyttalǵan baǵdarlamalar keshenin ázirleý qajet. Shekaralas óńirlerdiń óńirlik jáne óńiraralyq logistikasyn qamtamasyz etý úshin qajetti sharalar qabyldanýy tiis. Ekonomikalyq damýda jańa kásiporyndar men aýyl sharýashylyǵy óndirisin tiimdi órkendetýdi qoldaýǵa baǵyttalatyn arnaiy shekara mańy aimaqtaryn qurý máselesin qarastyrý kerek», – dedi senator.
