Qazaqstannyń tórt óńirinde shegirtke máselesi órship tur. Túrkistan oblysy, Jetisý oblysy, Qostanai men Aqtóbe oblystaryndaǵy jer ýchaskeleri shegirtke shabýylynan zardap shegýde.
Shegirtkemen kúreste aldyńǵy shepte júrgenderdiń biri - Premer-ministrdiń orynbasary Serik Jumanǵarin. Kúni keshe májilis kýlýarynda Jumanǵarin myrza shegirtkeniń shyndyǵynda halal ónim ekenin aitqan.
Áńgime tilshilerdiń Jumanǵarin myrzaǵa shegirtkeler týraly suraǵynan bastalǵan. Premer-ministrdiń orynbasarynan ziiankestermen kúres qalai júrip jatyrǵanyn bilmek bolǵan.
"Shegirtke árqashan bizben birge boldy. Dinozavrlar men mamonttardyń qurdasy. Biz onymen árdaiym kúresip kelemiz, kúrese beremiz. Keibir elder olardy óndirýdi jáne olardan keremet aqýyz taǵamdaryn daiyndaýdy úirendi. Árine, bul bizge kelmeitin shyǵar. Biraq, shyn máninde, bul halal ónim", - dep jaýap berdi Serik Jumanǵarin.
Qazaqstan musylmandar dini basqarmasy, Shariǵat jáne pátýá bólimniń mamany Elbek Tasbolatuly shegirtkeniń shariǵat boiynsha adal ekenin aitty.
"QMDB ustanatyn hanafi mashabynda paiǵambardyń hadisi boiynsha eki ólekse adal etildi, sonyń biri — shegirtke. Ony jeýge bolady. Alaida, adal degen sóz jei berýge bolady degen sózdi shyǵarmaidy. Iaǵni ony jeý mindettelmeidi, ár óńirdiń tabiǵaty men mádenietine bailanysty jep/jemeý árkimniń óz erkinde", - deidi din qyzmetkeri.
Joǵaryda aitylǵan hadisti paiǵambardyń sahabalarynyń biri Abdýllah ibn Omar jetkizgen. Atalǵan hadisti QMDB-nyń resmi saitynan jáne QMDB-ǵa tiesili "Halal damý" standarttaý jáne sertifikattaý ortalyǵynyń saitynan tabýǵa bolady.
Jýrnalister Densaýlyq saqtaý ministri Aqmaral Álnazarovadan da shegirtkeni jeýge bola ma dep surapty. Alaida Aqmaral Álnazarova bul suraqqa naqty jaýaby joq ekenin aitty.
"Árbir memlekettiń óziniń dástúri bar. Qazaqqa tán emes dástúr dep bilemin. Sondyqtan qazir onyń ziiany, paidasy bar, halal, halal emes dep aitýǵa daiyn emespin. Meniń quzyretime kirmeidi", - dep jaýap berdi vedomstvo basshysy.
Al búgin belgili bolǵandai, ziiankestermen kúres jumystaryn úilestirý maqsatynda vitse-premer Serik Jumanǵarin Jetisý oblysyna, Aýyl sharýashylyǵy ministri Aidarbek Saparov Túrkistan oblysyna, Aýyl sharýashylyǵy vitse-ministrleri Qostanai jáne Aqtóbe oblystaryna jumys saparymen barady.
Sondai-aq Aýyl sharýashylyǵy ministrliginiń 46 qyzmetkeri Túrkistan oblysyna issaparǵa jiberilgen. Olar búginde óńdeýge tiisti jerlerdi anyqtaý maqsatynda aýmaqtarda zertteý júrgizip jatyr. Eger ol jerden ziiankesterdiń taralý aimaqtary anyqtalsa, himiialyq zattardyń eki eselengen dozasymen qaita óńdeý jumystary júrgizilmek.
