QR Ekologiia, geologiia jáne tabiǵi resýrstar ministrliginiń uiymdastyrýymen «Sharyn» memlekettik ulttyq tabiǵi parkin damytý tujyrymdamasy onlain rejimde tanystyryldy, dep habarlaidy QazAqparat.
«Týristerdiń jyl saiynǵy kelýiniń ósýine qaramastan, demalý úshin qarapaiym jaǵdailar men qajetti infraqurylymnyń bolmaýyna bailanysty ulttyq parkterdegi ekologiialyq týrizm tiisti deńgeide damymai otyr. «Sharyn» memlekettik ulttyq tabiǵi park aýmaǵynda tórt týristik baǵdar bar. 2019 jyldyń qortyndysy boiynsha atalǵan baǵdarlarmen 20 640 adam júrip ótti. Týristerge qyzmet kórsetý nátijesinde ulttyq parktiń arnaiy shotyna 16 mln 700 myń teńge tústi», - dedi QR Ekologiia, geologiia jáne tabiǵi resýrstar vitse-ministri Erlan Nysanbaev.
Onyń aitýynsha, ulttyq parktegi týrizmniń qazirgi infraqurylymy zamanaýi talaptarǵa sai kelmeidi. Sonymen qatar atalǵan park aýmaǵyn damytýǵa investorlar tarapynan qyzyǵýshylyq tómen bolyp tur. Iaǵni, jumsalǵan shyǵynnyń ózin-ózi aqtaý merzimi uzaq. Osy oraida birqatar elderdiń tájiribesi, onyń ishinde AQSh-taǵy ulttyq parktiń jumysy, ekotýrizmdi damytý baǵytyndaǵy zańnamasy zertteldi.
«Halyqaralyq tájiribeni eskere otyryp, ulttyq parktiń ekologiialyq týrizmin damytýdyń qadamdary aiqyndaldy. Sonymen birge, negizgi ekpin týristik baǵdarlardy, soqpaq joldar jelisin damytýǵa qoiylady, sondai-aq saparlaý ortalyǵyn, kemping, etnoaýyldardy qurý eskerilgen. Biz birinshi kezekte týristik baǵdarlar men soqpaq joldarmen júrip ótýdi nasihattaýymyz kerek. Osy oraida ulttyq parktiń infraqurylymyn damytý qadamdaryn ózgertýdi josparlap otyrmyz», - dedi vitse-ministr.
Onyń sózine qaraǵanda, «Sharyn» ulttyq parkinde jeke investitsiialar tartý esebinen ekotýrizmdi damytý qarastyrylǵan. Bul turǵyda zamanaýi eki saparlaý ortalyǵyn, jaiaý júrginshiler úshin tórt baǵdardy, etnoaýyldardy, kórý alańdaryn jáne basqa da nysandardy qurý josparlanǵan. Rekreatsiialyq júktemeni azaitý úshin barlyq nysandar shatqaldan tys aýmaqta ornalasady.
Týrister saparlaý ortalyǵyna kelgen kezde, oǵan osy aýmaq týraly aqparat beriledi. Osy rette jaiaý júrý, velosiped baǵdarlary aiqyndalǵan.
Ekologiia ministrliginiń málimetinshe, ulttyq parkti damytý jobasy aiasynda aldan ala esepteýler boiynsha 3,6 mlrd teńge qajet bolady.
