Sharyn ulttyq parkinde tabiǵatta sirek kezdesetin albinos qaraquiryq videoǵa túsirildi, dep habarlaidy "Ult aqparat".
«Bizdiń Sharyn ulttyq parkindegi inspektorlary telefonnyń kamerasyna albinos qaraquiryqty túsirip aldy. Túsi appaq túz taǵysy – biz úshin úlken syi. Sebebi qaraquiryqtyń aq tústi túri tabiǵatta jii kezdese bermeidi. Albinostarǵa tirshilik etý qiyn bolsa da bul qaraquiryq aman qalar dep úmittenemiz», - dep jazdy Orman sharýashylyǵy jáne janýarlar álemi komitetiniń baspasóz hatshysy Sáken Dildahmet Facebook paraqshasynda.
Qaraquiryq Qazaqstannyń Qyzyl kitabyna engizilgen. Úshinshi sanattaǵy túz taǵysy. Iaǵni ańnyń sirek kezdesetin túrine jatady. Bóken tuqymdas tarmaǵy men qaraquiryq tuqymynyń elimizdegi jalǵyz túri.
«Janýarlar áleminde teri men júni, kózi tabiǵi sipattan tys túske ie ańdardy albinostar dep ataidy. Alaida tabiǵi ortada olarǵa tirshilik etý óte qiynǵa túsetinin kóp adam bile bermeidi. Sirek kezdesetin túske ie ańdar kóp jaǵdaida úiirinen shettelip qalady da, olarǵa kóbeiý úshin jup, tirshilik úshin azyq tabý qiynǵa ainalady. Mundai ǵajaiyp – týmysynan melaninniń, iaǵni teri, júni men kóziniń túsine jaýapty pigmenttiń joqtyǵynan tuqym deńgeiindegi mýtatsiiaǵa bailanysty bolady», - dep jazady Sáken Dildahmet.
Albinizm tuqymy álsiz bilinetin sipatqa ie. Iaǵni mundai tuqymǵa juptyń ekeýi de jatsa ǵana tól «appaq» túste dúniege keledi. Al eger mýtatsiialanǵan tuqym juptyń bireýinde ǵana bolsa tól kádimgi túspen týady. Albinos – óte sirek kezdesetin tabiǵi qubylys. Sebebi dál osyndai tuqymdy ańdardyń kezdesý yqtimaldyǵy 1/20 myńǵa teń.
