QR AShM Agrarlyq azyq-túlik naryqtary jáne aýyl sharýashylyǵy ónimin qaita óńdeý departamentiniń direktory Nazgúl Hatepova kei diirmenderdiń jumysy ne úshin toqtap qalǵanyn túsindirdi, dep habarlaidy QazAqparat.
«Ministrlik tarapynan, jalpy, qandai da bolsyn aýyl sharýashylyq daqylyna nemese taýaryna monitoring apta saiyn júrgiziledi. Naýryz aiyna deiingi nemese keiingi jaǵdaiǵa árine taldaý jasaldy. Ekinshiden, Astyq óndirýshiler odaǵy osy jaǵdai týraly, birneshe oblysta, sonyń ishinde Reseimen shekaralas óńirlerdiń astyq óńdeý kásiporyndary qazirgi kezde jumystaryn ýaqytsha toqtatqanyn aitqan edi. Búginde ishki naryqta bidaidyń qajetti kólemi bar. Biraq bidai baǵasy –endi ǵana týyndaǵan másele. Iaǵni, sharýalardyń kóktemgi dala jumystaryna degen shyǵystaryn eskere otyryp usynatyn ońtaily baǵasy bar. Bul baǵa un tartýshylar tarapynan narazylyq týdyryp, eki arada belgili bir kelisim bolmai tur. Sondyqtan qazir un tartý kásiporyndarynyń ýaqytsha toqtaýynyń negizgi sebebi osy. Jalpy ishki naryqta bidai bar, biraq un tartý kásiporyndarynan beriletin baǵa men sharýalar tarapynan usynylǵan baǵanyń arasynda úlken araqatynas bar. Bul máseleni biz ishki naryqqa arzandatylǵan bidai jiberý arqyly sheship otyrmyz», - dedi Nazgúl Hatepova Ortalyq kommýnikatsiialar qyzmetinde ótken baspasóz máslihatynda.
Buǵan deiin Astyq óńdeýshiler odaǵy elimizde bir jarym aptaǵa ǵana jeterlik bidai qory qalǵanyn málimdegen edi. Astyq ósirýshiler men óńdeýshiler bidaidy bólise almai daý týǵany, bidai taýsylsa. barlyq diirmender jumysyn toqtatýǵa májbúr ekeni aitylǵan edi.
Óz kezeginde Aidarbek Saparov elde eshqandai astyq tapshylyǵy joq ekenin málimdedi. 1 sáýirdegi jaǵdai boiynsha respýblikada 6,4 mln tonna astyq bolǵan.
7 sáýirdegi jaǵdai boiynsha eldegi un qory 118 myń tonnaǵa jetedi, onyń ishinde: turaqtandyrý qorlarynda - 10,4 myń tonna, «ainalym shemasy» aiasynda – 22 myń tonna, óndirýshilerde – 48,6 myń tonna, qoimalarda – shamamen 20 myń tonna jáne saýda obektilerinde – 18 myń tonna bar. Atalǵan kólem ishki qajettilikti qamtamasyz etýge tolyq jetkilikti.
