Túrkistan oblysynyń Jetisai qalasynda turatyn Oryn aqsaqal men Gúlsim ájeniń nekeleskenine 80 jylǵa taiady. Olar elimizde eń uzaq jasasyp kele jatqan otbasylyq jup sanalady, dep habarlaidy "Ult aqparat" Qazaqstan ulttyq arnasyna silteme jasap.
Qos qariianyń da jasy biyl 100-ge keledi. Ǵasyrǵa jýyq ǵumyr keshken qarttardan taraǵan urpaqtyń ózi búginde 200-den asqan.
Oryn aqsaqaldyń balalyq shaǵy asharshylyq kezine tuspas tus kelken. Ash-jalańashtyǵyna qaramastan anasy men jeńgesine ilesip, qoi baqty.
«Erte turatyn em. Qoidyń sońynan 4-5 jyl júrdim. Eshqandai atqa, esekke otyrǵan emespin. Qazir ǵoi bir shaqyrymǵa bola mashinaǵa otyrady. Qazir de kóbine jaiaý júremin» dep eske alady Oryn Aqshaev.
Myrzashóldi sýlandyryp, el osynda qonystana bastaǵan jyldary ata-anasyń uiǵarymymen Gúlsimmen bas qosty. Bir-birin tanyp bilmegen eki jastyń otbasylyq ómiri bastaldy. Jubaiy 14 qursaq kótergen. Qazir solardan 4 ul men 3 qyzdyń kózi tiri. Tuńǵyshynyń jasy búginde 71-de.
«Men kórmegendi bul kóredi. Bir-birimizdiń áńgimemizdi tyńdaimyz. Kórgenin aitady. Soǵan da qýanamyz. Syrlaspyz ǵoi, syrlas» deidi jubaiy Gúlsim Aqshaeva.
Oryn aqsaqal shańyraǵynan 20 qyz uzatyp, 28 kelin túsirgenin árkez maqtanyshpen aitady. Búginde eki uly men kelini, olardan taraǵan eki nemere men kishi kelinder de bir shańyraq astynda tatý-tátti kún keship jatyr. Ózgeleri óz aldyna bólek shańyraq.
«Qariiasy bar úidiń qonaǵy kóp bolady dep, sol qonaǵymen qyzyq bolady eken. Biraz kún qonaq kelmei qalsa saǵynyp otyramyz» deidi áýlettiń kelini Janar Orynova.
Jasy ulǵaiǵanymen Oryn aqsaqal áli tyń. Qimyly shiraq. Áli kúnge tulpar baptap, at minedi. Delebesi qozyp, báige men kókpar dodasyn tamashalaýǵa da baryp turady.
«At - erdiń qanaty» degen sóz bar ǵoi. Atqa mingenime 80 jyl boldy. Sodan beri atpen ainalysam. Mynaý - bes jasar atym. Balalarǵa ara tura shaptyryp qoiamyn. Ázir de ózim minip júremin» deidi Oryn aqsaqal.
Súiegi asyl qos qariia búginde shópshek súiip, perzentteriniń ósip-óngenin kórip, marqaiyp otyrǵan jaiy bar.
