Astana qalalyq Ishki ister departamentiniń qyzmetkerleri áiel máiitin sómkege salyp, «Shanhai» bazaryna tastap ketken er adamdy ustady, dep habarlaidy QazAqparat departamenttiń baspasóz qyzmetine silteme jasap.
13 qyrkúiek kúni Astanadaǵy «Shanhai» bazary mańynda sómke ishinen áiel máiiti tabylǵan edi. Sol kúni politsiia máiittiń 26 jastaǵy Ózbekstan azamatshasy ekenin anyqtady.
Departamenttiń habarlaýynsha, tergeý barysynda taǵaiyndalǵan sot-meditsinalyq saraptama áieldiń ishki organdardyń týberkýlezinen qaitys bolǵanyn kórsetken. Politsiia qyzmetkerleri júrgizgen jedel-izdestirý sharalary barysynda 30 jastaǵy er adam ustaldy.
«Óz jaýabynda er adam sońǵy úsh jylda marqum áielmen azamattyq nekede turǵanyn, 2 jasar uly bar ekenin aitty. Áiel aýyr naýqastan jaldamaly jataqhana bólmesinde kóz jumǵan. Onyń Ózbekstan azamatshasy bolýynan jáne jerleý rásimine qarajat bolmaǵandyqtan, azamattyq kúieýi máiitti sómkege salyp, bazar mańyna tastap ketken. Sol kúni Astana aýmaǵynan shyǵyp, izin jasyrǵan», - delingen resmi habarlamada.
Astana politsiiasy kúdikti er adamdy Túrkistan oblysy aýmaǵynan tapqan.
«Qaitys bolǵan áieldiń balasyna da izdeý salyndy. Sábi tanystarynyń qaraýynda bolǵan. Bala Astana qalasynyń kámelettik jasqa tolmaǵandardy beiimdeý ortalyǵyna ornalastyryldy», - dep habarlady Astana IID baspasóz qyzmeti.
