QR Prezidentiniń Qazaqstan halqyna Joldaýy týraly pikir bildirgen Jazýshylar odaǵynyń tóraǵasy Ulyqbek Esdáýlet súiinshi jańalyǵymen bólisti, dep habarlaidy QazAqparat.
Aqynnyń pikirine zer salsaq, keler jyly toilanatyn úsh úlken datany atap ótýdiń formatyna jańashyldyq qajet.
«Memleket basshysy óz Joldaýynda rýhaniiat taqyrybyn da ainalyp ótpedi. Sonyń ishinde Ál-Farabi 1150 jyldyǵyn, uly Abaidyń 175 jyldyǵyn, Altyn Ordanyń 750 jyldyǵyn toilaý týraly sóz qozǵady. Bul ǵibratty datalar urpaqqa tálim berýimen qundy. Iaǵni, ysyrapshyldyqqa, asta-tók meimanasyna, masairaýǵa jol berilmeýi kerek. Joldaýda da bul sharalardyń urpaqqa paidaly, qoǵamǵa kerekti, keleshekke ónegeli jaqtaryn ustaný kerektigi aityldy. Altyn Ordanyń 750 jyldyǵynda qazaq tarihyna álem nazaryn taǵy bir aýdartý, sol arqyly týrizmdi damytý kózdelgeni de kóńilden shyǵyp otyr. Óitkeni Altyn Ordanyń tarihy – bizdiń tarih. Bizdiń tarihymyz – Altyn Ordanyń tarihy», - deidi U.Esdáýlet.
Jazýshylar odaǵynyń basshysy bul talapqa qalamger qaýym da úles qosatynyn aitady.
«Úsh toidy da ǵibratty etip ótkizý kerek dep jatyrmyz ǵoi. Mysaly, Qytaidyń Shanhai qalasyndaǵy bir baspa Muhtar Áýezovtiń 10 tomdyǵy men Abaidyń 1 tomdyǵyn qytai tiline aýdaryp shyǵaratyn boldy. Atalmysh baspa Shyńǵys Aitmatovtyń 10 tomdyǵyn shyǵarǵan eken. Sondaǵy aǵaiyndarymyz Sh.Aitmatovtyń ustazyn nege shyǵarmaisyńdar degen maǵynada usynys tastaǵan eken, kelisipti. Sony estip, M.Áýezovtiń de ustazyn shyǵaryńyzdar degen oi aitqanbyz. Birden kelisip, Abaidyń 10 tomdyǵyn shyǵaratyndaryn aitty. Abaidyń barlyq shyǵarmasy bir tomnan aspaitynyn túsindirip, kelisimge kelip qaittyq», - deidi Ulyqbek Esdáýlet.
