QR Aqparat jáne qoǵamdyq damý ministri Dáýren Abaev Almatyda birqatar taǵaiyndaý jasady, dep habarlaidy "Ult aqparat".
«Búgin qazaqtildi basylymdar úshin mańyzdy birqatar taǵaiyndaýlar jasadym. Aldymen, quramyna «Jas órken» JShS biriktirý arqyly qaita qurylǵan «Qazaq gazetteri» JShS Bas direktory etip Shámshidin Pátteevti qaita taǵaiyndadym. Shámshidin Áshenqojauly Qazaqstan Respýblikasynyń Eńbek sińirgen Mádeniet qairatkeri, «Qurmet» ordeniniń iegeri, baspasóz salasynda elimizge belgili kásibi menedjer. Seriktestik baspasóz salasyn, onyń ishinde, balalar baspasózin damytýda úlken eńbek atqaryp keledi», - dep jazdy Aqparat jáne qoǵamdyq damý ministri Dáýren Abaev facebook paraqshasynda.
Sondai-aq, ministr aldaǵy ýaqytta da jasalǵan qurylymdyq ózgerister nátijesimen oqyrmandaryn tyń dúniemen, qyzyqty, tartymdy aqparattarmen sýsyndata beretinine senetinin jetkizdi.
«Sonymen birge, ǵasyrlyq tarihy bar, qazaq baspasóziniń qara shańyraǵy sanalatyn «Egemen Qazaqstan» gazetiniń Almaty qalasyndaǵy redaktsiiasynyń basshysy laýazymyna Júsipbek Qorǵasbekti taǵaiyndadym. Júsipbek Nuraqynuly elimizge belgili jýrnalist, eńbek jolyn «Leninshil jas» gazetinen bastap, «Qazaq ádebieti», «Jas alash» basylymdarynda eńbek etken. 2008 jyldan bastap «Jas órken» JShS-niń bas direktory qyzmetin abyroimen atqaryp keldi. Seriktestiktiń quramyndaǵy «Ulan», «Drýjnye rebiata» gazetteri, «Aq jelken», «Baldyrǵan» jýrnaldary elimizdegi barlyq balalardyń súiikti basylymdaryna ainaldy. Bul ujymnyń tabandy eńbeginiń jemisi dep bilemin», - dedi ministr.
