Túrkistan oblysynyń Otyrar aýdanynda týyp-ósip, «qazaq valsiniń koroli» atanǵan Shámshi Qaldaiaqovqa týǵan jerinde mýzei ashyldy, dep habaraidy "Ult aqparat" óńirlik kommýnikatsiialar qyzmetine silteme jasap.
Atalǵan shara Uly kompozitordyń 90 jyldyq mereitoiyna arnaldy. Qazaq rýhaniiaty úshin eleýli merekege oblys basshysy arnaiy kelip, mýzeimen tanysty.
«Búgin aitýly mereke. Shámshi Qaldaiaqovtyń týǵanyna 90 jyl tolyp otyr. Alaida, osy oblysqa kelgeli Shámshiniń kindik qany tamǵan jerde Shámshige arnalǵan mýzeidiń joq ekenin bildim. Tipti bizdiń búkil respýblikada «Qazaq valsiniń koroline» arnalǵan birde-bir mýzei joq. Az ýaqyt ishinde ketken kemshiliktiń ornyn toltyrý úshin tapsyrma berip, demeýshiler esebinen Shámshi mýzeiiniń ashylýyn qolǵa aldyq. Shámshi mýzeii – Jidebaidaǵy Abai mýzeii sekildi jas kompozitorlar men jas ánshiler táý etetin ziiarat ornyna ainalýy tiis», - dedi Ómirzaq Shókeev.
Atap óteiik, bul nysan Shámshiniń kózin kórgen, onyń ómirine qanyq azamattar esteligin esepke ala otyryp salyndy.
Mýzei ishinde Uly kompozitordyń ózi qoldanǵan buiymdary, saz shyǵarýǵa sep bolǵan mandolinasy sekildi qundy jádigerler bar. QR Ulttyq Mýzeii Shámshiniń jańadan ashylǵan mýzeiine kompozitordyń bas kiimin ákelip tartý etti.
Shámshi muraǵatyn kútip-baptaý úshin mekeme oblystyq mýzeidiń filialy retinde ashylyp, arnaiy shtat sanymen mamandary jumys isteitin bolady. Kelgen týrister men qonaqtarǵa barlyq jaǵdai jasalady.
Óskeleń urpaqqa Shámshini nasihattaý jumystary munymen toqtap qalmaidy. Eń aldymen oblys ortalyǵyndaǵy jańa mýzyka mektebine Shámshi Qaldaiaqov esimi berilse, mýzyka mektebiniń aldynda eńseli eskertkishi boi kóteredi.
Sondai-aq, Túrkistan qalasyndaǵy kóshelerdiń biri sazger esimimen atalady.
