Almaty oblysynyń Shamalǵan temirjol stansa jol ótpesiniń qurylysy biyl qarqyn almaq. Búgingi tańda nysanda aldaǵy qurylys maýsymyna daiyndyq jumystary júrgizilýde, dep habarlaidy "Ult aqparat".
QR Indýstriia jáne infraqurylymdyq damý ministrliginiń Avtomobil joldary komiteti Shamalǵan stansasyndaǵy jol ótpesiniń qurylysyn júrgizý taqyrybyna arnalǵan ǵylymi-tehnikalyq keńes ótkizdi. Shara aiasynda kóliktik jol aiyryǵyn birinshi tehnikalyq sanatqa sáikes jobalaý jóninde sheshim qabyldanǵan bolatyn. Mamandar jol ótpesin uzyndyǵy 340 metrdi quraityn estakada túrinde salý nusqasyn anyqtady.
«Qurylys jumystary úshin Shamalǵan men Ekpindi eldi mekenderiniń arasyndaǵy jol ýchaskesi tańdap alyndy. Jol aiyryǵy qoldanystaǵy temirjol ótpesinen 250 metrge alshaqtaý ornalasady. Bul negizgi tasjoldarǵa jetý jolyn 0,7 shaqyrymǵa qysqartýǵa, sondai-aq tranzitti kólik aǵynyn eldimekennen tys jerge shyǵarýǵa múmkindik beredi», - delingen QR IIDM baspasóz qyzmetiniń málimetinde.
Belgili bolǵandai, 2019 jyldyń qarashasynda «Sáýlet-SKB» JShS jobalyq-smetalyq qujattamany ázirleý sharalaryna kirisken edi. Atalmysh sharalar osy jyldyń naýryzynda aiaqtalady dep josparlanyp otyr. Jeltoqsan aiynda «Todini Konstrýtsioni Djenerali S.p.A.» AQ/ «Integra Construction KZ» JShS Konsortsiýmymen qurylys-montajdaý jumystaryn atqarý jónindegi kelisimshartqa qol qoiyldy. Nysan 2021 jyldyń tamyzynda paidalanýǵa beriledi dep josparlanýda.
Budan bólek, «DSÝ-13» JShS oblystyq mańyzy bar «Almaty-1 – Shamalǵan – Uzynaǵash» avtojolynda Shamalǵan stantsiiasyndaǵy temirjol ótpesi arqyly ótetin jerústi jaiaý júrginshiler ótpesin salyp jatyr. Bul maqsattarǵa jergilikti biýdjetten 330 mln teńge bólingen.
Eske sala keteiik, QR Úkimetiniń qaýlysymen Shamalǵan stantsiiasyndaǵy temirjol ótpesi erekshe retteýdi talap etetin qurylys nysandarynyń qataryna jatqyzylǵan.
Esterińizge sala keteiik, ótken jyly 15 qyrkúiek kúni Shamalǵan stansasynda poiyz relste turyp qalǵan avtobýsty kelip soqqan edi.
Apattan avtobýs júrgizýshisi mert bolyp, taǵy 3 adam zardap shekti.
Keiin Shamalǵan stansasynda júrginshiler kópiriniń qurylysy bastaldy.
