Aqtóbe oblysynyń Shalqar aýdanynda «Shuǵylaly Shalqarym!» atty respýblikalyq jerlester forýmy ótip jatyr. Oǵan 2,5 myńǵa jýyq adam qatysýda. Shaqyrylǵandardyń arasynda aýdannyń Aqtóbe oblysynan tys jerlerde turyp jatqan 140-tan asa tabysty ári tanymal týmalary, sonyń ishinde professor Serik Aqsholaqov ta bar.
Forým «Rýhani jańǵyrý» baǵdarlamasy aiasynda uiymdastyrylǵan jáne elordanyń 20 jyldyǵyna arnalǵan. Sharanyń basty maqsaty – kishi otanǵa degen patriotizm men súiispenshilikti qalyptastyrý, aýdannyń belgili bir jetistikke jetken týmalaryn týǵan ólkesin áleýmettik-ekonomikalyq jaǵynan damytýǵa tartý.
Qatysýshylar jergilikti taýar ainalymyn, meditsina, biznes pen azamattardyń áleýmettik jaýapkershiligin damytý suraqtaryn talqylady.
Forýmnyń qorytyndysynda Shalqar aýdanyndaǵy áleýmettik nysandardyń qurylysyna jeke investitsiialardy tartý týraly memorandýmdarǵa qol qoiyldy. Atap aitqanda, «Týǵan jerge taǵzym» aktsiiasy aiasynda kásipkerler aýdan ortalyǵynda Jastar saraiyn, kúndizgi statsionary bar aýrýhana men júz oryndyq balabaqsha, Qaýyljyr aýylynda sport saraiy men balabaqsha, Jańaqonys aýylynda aýyl klýbyn salý týraly kelisimge qol qoidy.
Sonymen qatar, kásipker Daniiar Qoblandin Shalqarǵa jańa jol salyp berý týraly sheshim qabyldady. Qalalyq joldardyń bireýiniń 2,5 kilometrin qalpyna keltirý úshin kásipker 75 million teńge aýdarady. Bul jobalardyń jalpy quny 630 mln. teńgeni quraidy.
Oblys ákimi Berdibek Saparbaev, týǵan jerdiń gúldenýine úles qosý árbir adamnyń mindeti ekenin atap ótti.
- Memleket basshysy Nursultan Nazarbaev: «Bizde bir Otanymyz - Qazaqstan bar, ekinshisi - joq», - deidi.
Árbir azamat múmkindiginshe óz týǵan jerine kómektesýi kerek. Kómek aqshalai nemese qandai da bir obektilerdiń qurylysy bolý mindetti emes. Mysaly, kórnekti neirohirýrg dáriger Serik Aqsholaqov týǵan jerin umytpai, kóptegen qaiyrymdylyq operatsiialaryn ótkizdi. Patsientterdiń ómirin qutqaryp, ol jas aqtóbelik dárigerlerge qaiyrymdy isin úiretedi. Ár adam ózi tárbielengen týǵan jerine jii kelip, óskeleń urpaqpen kezdesip, bar jetistikterin týǵan ortasymen bólisýge, óz talantyn syilaýǵa tiis - dedi aimaq basshysy.
Konferentsiia «Baqytty bala» aimaqtyq baǵdarlamasynyń aiasyndaǵy qaiyrymdylyq sharasymen aiaqtaldy. 100 bala Astanada demalý úshin, 25 bala Ortalyq Aziiadaǵy eń kóne qalalarynyń biri Túrkistannyń tarihi jáne mádeni kórikti jerlerine saiahat jasaýǵa jáne demalýǵa joldama aldy. 373 oqýshy Oral qalasynyń eń jaqsy qala mańyndaǵy jazǵy lagerleriniń birine barady. Ata-anasynyń qamqorlyǵynsyz qalǵan 38 jetim balaǵa 3,8 mln teńgege QTÚJB esep shottaryn qosymsha tolyqtyrý úshin sertifikattar tabys etildi. Buǵan qosa, kóp balaly 10 anaǵa shipajaiǵa joldama berildi.
