Aqtóbe oblysyndaǵy Shalqar kóliniń tabany tazalanady. QR Ekologiia, geologiia jáne tabiǵi resýrstar ministri Maǵzum Myrzaǵaliev Twitter-degi paraqshasynda osylai jazdy, dep habarlaidy "Ult aqparat".
«Aqtóbe oblysyndaǵy Shalqar kólinde jaǵdai qiyn. Sońǵy jyldary sý arnasy tartylyp, túbi keptelip qalǵan. Bul klimattyq jaǵdailarǵa bailanysty, sebebi Muǵaljar taýlarynda jaýyn-shashyn az túsýde, qysta qar az.
Biz biyl kóldiń tabanyn tazalaý jobasyn bastaimyz. Qajetti qarjy bólinip jatyr. Shara kóldegi sýdyń sapasyn, gidromihiialyq quramyn jaqsartýǵa, Shalqar qalasyn sharýashylyq-turmystyq sýmen qamtamasyz etýge múmkindik beredi», - dedi Maǵzum Myrzaǵaliev.
Ministrdiń aitýynsha, óńirge arnaiy komissiia barǵan.
«Aimaqqa komissiia baryp, qar qorynyń qalyńdyǵy sońǵy 10 jylda orta eseppen 34 mm-di quraǵanyn anyqtady. Bul ortasha kópjyldyq kórsetkishten 20 mm-ge az. Al qar qory ózender men kólderdi negizgi sýmen qamtamasyz etedi», - dedi ol.
Eske salaiyq, Qudaibergen Jubanov atyndaǵy ýniversitettiń ekologiia kafedrasynyń dotsenti Aqyljan Teleýov Shalqar kóli men Muǵaljar taýlarynyń máselesi qazirden bastap sheshilmese, Aqtóbe oblysyna ekologiialyq apat qaýpi tónip turǵanyn málimdegen bolatyn. Jergilikti turǵyndar Shalqardaǵy sý deńgeii kúrt tómendei bastaǵanyn baiqap, dabyl qaǵyp otyr. Kól batpaqqa ainala bastady, túbi lai, jaǵasy qamysqa tolǵan.
