Senat tóraǵasynyń orynbasary Asqar Shákirov EQYU Parlamenttik Assambleiasy óziniń «Helsinki + 50» protsesi - is-qimylǵa úndeý» bastamasy sheńberinde uiymdastyrǵan «Áielder, beibitshilik jáne qaýipsizdik» atty onlain-konferentsiiaǵa qatysty, dep habarlaidy "Ult aqparat" Senattyń baspasóz qyzmetine silteme jasap.
Onlain dialogqa qatysýshylar janjaldardyń aldyn alý men sheshýdegi, bitimgershilikke, áielder men qyzdardy genderlik teńsizdikten qorǵaýǵa áielderdiń tolyq jáne mańyzdy qatysýyn qamtamasyz etýdegi Parlamenttik assambleia men ulttyq parlamentterdiń rólin talqylady.
EQYU Parlamenttik Assambleiasynyń vitse-prezidenti Asqar Shákirov óz sózinde áielderdiń quqyqtaryn jan-jaqty qorǵaý, olarǵa qatysty zorlyq-zombylyq pen kemsitýshilikti joiý, sondai-aq áielderdi bilik qurylymdarynda ilgeriletý EQYU-ǵa múshe memleketterdiń damýyndaǵy mańyzdy basymdyq bolyp tabylatynyn atap ótti.
«Qazaqstan genderlik teńdikti qamtamasyz etý baǵytynda BUU-nyń Myńjyldyq damý maqsattaryna merziminen buryn qol jetkizdi jáne TMD elderi arasynda Genderlik damý indeksi boiynsha kóshbasshy bolyp tabylatyn «genderlik damý deńgeii óte joǵary» elderdiń qataryna kiredi»,- dedi vitse-spiker.
Ol Prezident Qasym-Jomart Toqaevtyń sailaýdaǵy saiasi partiialardyń kandidattary tiziminde áielder men jastar úshin 30 paiyzdyq kvota engizý jónindegi bastamasynyń mańyzdylyǵyn atap ótti. Bul Parlament Májilisindegi áielder ókildigin 27%-ǵa deiin ulǵaitýǵa múmkindik berdi.
Áielderdiń shaǵyn jáne orta biznestiń 43%-yn basqaratynyn eskere kele jumys oryndaryn qurýdaǵy jáne ekonomikalyq ósýdi yntalandyrýdaǵy mańyzdy róli atap ótildi.
Qazaqstandyq áskeri qyzmetshi áielder erlermen qatar BUU missiiasy sheńberinde janjaldan keiingi elderde beibit ómirdi qalpyna keltirýdiń bitimgershilik baǵdarlamalaryna qatysady.
Qorytyndylai kele, qazaqstandyq senator EQYU parlamentariilerin áielder ókildigi máselelerinde úlken tepe-teńdikti qamtamasyz etýge, áielderdiń óz múmkindikterin tolyq iske asyrýy úshin qolaily jaǵdailar jasaýǵa jáne áleýetin arttyrýǵa járdemdesýge shaqyrdy.
