Qaraǵandy oblysynyń qylmystyq ister jónindegi mamandandyrylǵan aýdanaralyq soty Shahtinsk qalasynyń boksshysy Ivan Tatsiidiń ólimine qatysty is boiynsha úkim shyǵardy. Aiyptalýshy 11 jylǵa bas bostandyǵynan aiyryldy, - dep habarlaidy Tengrinews.kz.
Qylmystyq isti Qaraǵandy oblysynyń Qylmystyq ister jónindegi mamandandyrylǵan aýdanaralyq sotynyń sýdiasy Qairat Qasymov qarady. Sottalýshy QR QK-nyń 99-baby 1-bóligi "Adam óltirý" boiynsha sotqa tartyldy. Sot ony kináli dep tanyp, 11 jylǵa bas bostandyǵynan aiyrý jazasyn qatań rejimdegi mekemede óteýge úkim shyǵardy.
"2020 jyldyń 20 tamyzynda Shahtinsk qalasynda sottalýshy dostarymen birge avtovokzal artyna Ivan Tatsiidi buryn bolǵan kelispeýshilikti sheshý úshin shaqyrǵan. Sol tóbeles kezinde Ivan pyshaqtalǵan. Sottalýshy pyshaǵyn joldyń boiyna laqtyryp, oqiǵa ornynan qashyp ketti. Onyń kinási aiǵaqtarmen, beinejazbalarmen jáne sot-meditsinalyq saraptamalarmen dáleldendi", - dedi Qaraǵandy oblystyq qylmystyq izdestirý basqarmasynyń baspasóz qyzmetindegiler.
Aita keteiik, QR QK-nyń 99-babynyń sanktsiiasy boiynsha 8 jyldan 15 jylǵa deiin bas bostandyǵynan aiyrý jazasy qarastyrylǵan.
"Sottalýshy buryn qylmystyq jaýapkershilikke tartylmaǵan. Ol jasaǵan isine ókingen joq. Sondyqtan, ol qatań tártiptegi qylmystyq-atqarý júiesi mekemesinde jazasyn ótei otyryp, 11 jylǵa bas bostandyǵynan aiyryldy. Sot úkimi zańdy kúshine engen joq", - dedi sot.
Eske salaiyq, 2020 jyldyń 20 tamyzyna qaraǵan túni Shahtinsk qalasynyń ortalyq aýrýhanasyna pyshaq jaraqatymen 24 jastaǵy qala turǵyny jetkizilgen. Jas jigit es-tússiz jatqan. Dárigerler barlyq kúsh-jigerlerin salǵanyna qaramastan jigitti aman alyp qala almady. Keiin marqumnyń kásipqoi bokspen ainalysqany belgili boldy. Ony óltirdi degen kúdikpen Shahtinsk qalasynyń 22 jastaǵy turǵyny ustaldy. Qaitys bolǵan adam men ustalǵan jigit buryn dos bolǵan.
