Foto: ©️ Tengrinews.kz / Týrar Kazangapov
Qaraǵandy oblysynyń ákimdigi ýákiletti memlekettik organdarmen birlesip, Kostenko atyndaǵy shahtada bolǵan órt saldarynan qaza tapqan «ArselorMittal Temirtaý» AQ jumysshylarynyń otbasy músheleriniń tizimin jasap jatyr. Memleket basshysynyń tapsyrmasy boiynsha olarǵa tolyqqandy kómek kórsetiledi. Bul týraly Úkimettiń baspasóz qyzmeti habarlady.
Eńbek jáne halyqty áleýmettik qorǵaý ministri Svetlana Jaqypova Kostenko atyndaǵy shahtada bolǵan órt kezinde qaza tapqandardyń otbasylaryna qandai kómek kórsetiletinin aitty.
«Memleket tarapynan qazaq tapqan shahterlerdiń otbasylaryna asyraýshysynan aiyrylǵany úshin tólemder tólenedi. Birinshisi – bazalyq járdemaqy, ekinshisi – áleýmettik saqtandyrý qorynan, úshinshisi – ómirdi saqtandyrý kompaniiasynan tólenedi. Tólemderdiń ortasha mólsheri 400 myńnan 500 myńǵa deiin jetedi. Ol tólemder asyraýynda bolǵan jasóspirimder 18 jasqa tolǵansha, eger balalar mektepten keiingi joǵary bilim alyp jatsa, 23 jasqa tolǵansha beriledi», - dedi ministr.
Sondai-aq «ArselorMittal Temirtaý»-dyń ujymdyq shartyna sáikes, kompaniia mindetti túrde qaza tapqan shahterdiń otbasyna 10 jyldyq eńbekaqysyn tóleidi.
Bul rette, Úkimet baspasóz qyzmeti kóz jumǵan jumysshylardyń januialaryna kórsetiletin qoldaý sharalarynyń tolyq tizimin jariialady:
– kompaniia qarajaty esebinen otbasylarǵa baspana satyp alý;
– moraldyq ziian úshin 10 jyldyq jalaqy mólsherinde birjolǵy tólem;
– asyraýynda bolǵan balalarǵa 18 jasqa tolǵanǵa deiin ai saiynǵy saqtandyrý tólemi (JOO stýdenti bolsa, 23 jasqa deiin);
– Memlekettik áleýmettik saqtandyrý qorynan jalaqysyna bailanysty ai saiynǵy tólem;
– qamqorlyqtaǵy adamdardyń sanyna bailanysty asyraýshysynan aiyrylý jaǵdaiy boiynsha ai saiynǵy memlekettik járdemaqy;
– jumys berýshiniń qarajaty esebinen otbasylardyń nesielerin óteý;
– jerleýge bailanysty barlyq shyǵyndardy óteý;
– qaza tapqandardyń balalary men jubailaryn jumysqa ornalastyrý;
– 23 jasqa deiingi balalardyń oqý aqysyn tóleý;
– qaza tapqandardyń jubailary men balalaryna sanatorii-kýrorttyq emdelýge joldamalar berý;
– úidi peshpen jylytatyn otbasylarǵa jyl saiyn kómir bólý.
Memleket basshysynyń tapsyrmasyna sáikes «ArselorMittal Temirtaý» AQ-nyń qaza tapqan qyzmetkerleriniń otbasylaryna barlyq qajetti kómekti kórsetý máseleleri QR Úkimetiniń erekshe baqylaýynda.
Eske salaiyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17:33-tegi málimet boiynsha 33 kenshiniń denesi tabyldy, 13 adam izdestirilip jatyr.
