Foto: Sputnik, Konstantin Mihalchevskiy
Tótenshe jaǵdailar ministri Syrym Sháriphanov Úkimet otyrysynda "ArselorMittal Temirtaý" kompaniiasyna qaraityn Kostenko shahtasyndaǵy apattan qaza tapqan adamdardyń sany 46-ǵa jetkenin málim etti, - dep habarlaidy agenttigi "Ult aqparat".
Vedomstvo basshysynyń aitýynsha, 28 qazanǵa qaraǵan túni Kostenko shahtasynda 700 metr tereńdikte órt shyǵyp, keiin metan-aýa qospasy jarylǵan. Oqiǵa ornyna dereý «Kásibi áskerilendirilgen avariialyq-qutqarý qyzmetteriniń respýblikalyq ortalyq shtaby» JShS Qaraǵandy filialynyń kúshteri jumyldyrylǵan.
"Búgingi kúni izdestirý-qutqarý jumystary barysynda 45 kenshiniń denesi jáne aldyn-ala boljam boiynsha, qaza tapqan 46-shy adamnyń dene bólshekteri tabyldy. Qaitys bolǵan 40 adamnyń jeke basy anyqtaldy, altaýy áli belgisiz. Olardy sáikestendirý úshin tiisti saraptamalar júrgiziledi.
Izdeý jumystary elektr energiiasynyń bolmaýymen, taý-ken qazbalarynyń uzyndyǵymen, kóptegen buzylǵan mehanizmderdiń bolýymen qiyndady. Sý basqan jekelegen taý-ken qazbalarynda jumys jasaý qiynǵa tústi" - dedi ministr.
Sháriphanovtyń aitýynsha, qazirgi ýaqytta ashyq janý oshaqtary joq, gaz jaǵdaiy qalypty. Shahtanyń qyzmetin qalpyna keltirý úshin taý-ken qazbalaryn zertteý jáne jekelegen ýchaskelerde sý sorý jumystary júrgizilip jatyr.
«Avariianyń sebepterin tergep-tekserý sheńberinde Úkimettik komissiia múshelerimen birge shahtaǵa tústim. Biz óte mańyzdy buzylýlardy anyqtadyq. Taý-ken qazbalarynda shahta jabdyqtary jyljyp ketken. 15-ten astam oqshaýlaǵysh bóget pen jeldetý qurylysy qiraǵan», - dep atap ótti ministr.
Vedomstvo málimetinshe, búginde taǵy 7 shaǵyn komissiia qurylyp, jumys istep jatyr. Sonymen qatar tergeýge Qazaqstannan jáne shetelderden saraptamalyq uiymdar tartylǵan.
Aita keteiik, avariia kezinde aýysymda 252 kenshi bolǵan, onyń 201-i ózdiginen kóterilip, 5-i taý-ken qutqarý kúshterimen tabylyp, jer betine shyǵarylǵan.
Jalpy, 30 qazannan bastap Qaraǵandy oblysynyń bes shahtasynda (Abai, Saran, Shahtinsk, Kúzembaev jáne Lenin atyndaǵy) óndirý protsesteri qaita jandandy. «Tentek» shahtasynda tek daiyndyq jumystary júrgizilip jatyr. «Qazaqstan» shahtasynda onyń qarqyndy jumys isteýi úshin barlyq jumystar qamtamasyz etilýde jáne aerogaz jaǵdaiy baqylaýda.
