foto: andresr / Getty Images
Qaraǵandy oblysy Kostenko atyndaǵy shahtada bolǵan apat saldarynan qaza bolǵandar sany 45-ke jetti, dep habarlaidy "Ult aqparat" Tótenshe jaǵdailar ministrligine silteme jasap.
"Kostenko atyndaǵy shahtada avariiany joiý jónindegi jedel shtab táýlik boiy jumys istep jatyr.
Saǵat 20.00-degi jaǵdai boiynsha 45 kenshiniń denesi tabyldy, 1 kenshini izdeý jalǵasýda. Jumystar bir-birinen shamamen 6 km qashyqtyqta ornalasqan eki óndirý ýchaskesi aýdanynda júrgizilýde. Kenshiler ornalasýy múmkin yqtimal ýchaskelerge taý-ken qutqarýshylarynyń ótýiniń barlyq múmkin joldary pysyqtalyp jatyr" - delingen habarlamada.
Vedomstvo málimetinshe, apattyń boljamdy epitsentrin tekserý úshin TJ ministri Syrym Sháriphanov shahtaǵa túsken.
"Tekserý barysynda órt pen jarylystyń áserine ushyraǵan qazbalar qaraldy, onda:
- shahta jabdyǵynyń buzylýy jáne jyljýy;
- metall-arkaly bekitý elementterindegi shań shógindileri;
- jeldetý qurylystarynyń zaqymdanýy anyqtaldy.
Kózge kórinetin janý oshaqtary joq, gaz jaǵdaiy qalypty. Sonymen qatar Syrym Sháriphanov avariiany tergeý jónindegi Úkimettik komissiia múshelerimen otyrys ótkizdi" - delingen habarlamada.
Jumystardy jan-jaqty qamtamasyz etý TJ ministriniń jeke baqylaýynda. Jumys jalǵasyp jatyr.
