Qazaqstan Syrtqy ister ministriniń birinshi orynbasary Shahrat Nuryshev Japoniianyń Syrtqy ister Parlamenttik vitse-ministri Satoshi Nakanishimen kezdesý ótkizdi, dep habarlaidy "Ult aqparat" vedomstvonyń resmi saityna silteme jasap.
Kezdesý barysynda taraptar Qazaqstan-Japoniia strategiialyq áriptestiginiń jai-kúii men damý perspektivalaryn talqylady.
Sh.Nuryshev joǵary deńgeidegi saiasi dialogtyń, Qazaqstan men Japoniia parlamentteri arasyndaǵy tyǵyz bailanystardyń, saýda-ekonomikalyq jáne investitsiialyq bailanystardyń údemeli damýdyń, sondai-aq eki el arasyndaǵy gýmanitarlyq bailanystardyń mańyzdylyǵyn atap ótti.
S.Nakanishi Qazaqstannyń iadrolyq qarýdy taratpaý jáne iadrolyq qarýsyz álem qurý týraly ideiany ilgeriletý máselelerindegi erekshe rólin atap ótti. «Ortalyq Aziia + Japoniia» dialogy, sondai-aq halyqaralyq uiymdardyń, ásirese BUU-nyń sheńberinde eki eldiń ózara is-qimylyna joǵary baǵa berildi.
Japon tarapyna COVID-19 emdeý úshin qajetti meditsinalyq jabdyqtardy satyp alýǵa grant bergeni úshin alǵys bildirildi. Bul dostyq peiil Qazaqstan men Japoniianyń strategiialyq áriptestik rýhynyń kórinisi.
Taraptar tsifrlandyrý, qarjy, aýyl sharýashylyǵy jáne jasyl ekonomika siiaqty salalardaǵy investitsiialyq yntymaqtastyqty odan ári ártaraptandyrý týraly ýaǵdalastyqqa qol jetkizdi. Osyǵan bailanysty Qazaqstan men Japoniianyń ekonomikalyq yntymaqtastyq jónindegi úkimetaralyq jáne jeke sektorlar komissiiasynyń 8-shi otyrysyn jedel ótkizýdiń mańyzdylyǵy atap ótildi.
Japoniia Qazaqstan ekonomikasyna jalpy investitsiia kólemi 7 mlrd AQSh dollarynan asatyn 10 iri sheteldik investorlardyń qataryna kiredi.
