Memleket basshysy Qasym-Jomart Toqaevtyń Tótenshe jaǵdai rejimin qamtamasyz etý jónindegi memlekettik komissiianyń otyrysynda shaǵyn jáne orta biznestiń jumysyn birtindep jandandyrý kerektigin aitty, dep habarlaidy "Ult aqparat".
Memleket basshysy shaǵyn jáne orta biznes jumysyn birtindep jandandyrý boiynsha naqty jumystardy Úkimet ákimdermen tyǵyz úilestirý arqyly júrgizýi tiis ekenin aitty. Osy oraida bul sharalar elimizdiń iri eki qalasynan bastap qolǵa alynady.
«Tiisti usynystar aityldy. Olardy eskerý kerek. Bul turǵyda jandandyrý sharalaryn iske asyrý kerek. Bizdiń aldymyzda qos maqsat tur, iaǵni bizdiń azamattardyń densaýlyǵy úshin karantin tártibin saqtaý, sondai-aq naqty sharalarmen kásiporyndardy jumys rejimine shyǵarý kerek»,- dedi Prezident.
Osy oraida Memleket basshysy ákimdikter sanitarlyq-epidemilogiialyq rejimdi, jumys oryndarynda áleýmettik qashyqtandyrýdy qatań túrde qamtamasyz ete alatyn kásiporyndardyń tizimin daiarlaý kerektigin atap ótti.
«Óńirlerdegi daǵdarysqa qarsy shtabtar osyndai jumys oryndaryn tekserýdi qamtamasyz etedi. Shtabtar kásiporyndar jumysynyń rejimin, qyzmet oryndaryna jumysshylardy jetkizý tártibin jáne basqa da uiymdastyrý-tehnikalyq sharalaryn aiqyndaityn bolady. Osynyń negizinde Memlekettik komissiia tiisti kásiporyndardyń qyzmetin jandandyrý týraly sheshimdi qabyldai alady», - dedi Qasym-Jomart Toqaev.
