Shaǵyn jáne orta biznesti jeńildikpen nesieleý baǵdarlamasy 2021 jyldyń sońyna deiin uzartylady. Bul týraly Ulttyq bank tóraǵasynyń orynbasary Esjan Birtanov aitty, dep habarlaidy QazAparat.
Memleket basshysynyń daǵdarysqa qarsy bastamalary sheńberinde naýryzdan bastap jalpy somasy 600 mlrd teńgege qarjylandyrý limitimen shaǵyn jáne orta biznesti (ShOB) qoldaý úshin jeńildikpen kreditteý baǵdarlamasy iske asyrylyp keledi.
«Baǵdarlama tótenshe jaǵdaidy engizý nátijesinde zardap shekken qarjylyq jai-kúiiniń nasharlaýy baiqalatyn ShOB sýbektilerin qoldaýǵa baǵyttalǵan. Qarjylyq jaǵdaidyń nasharlaýyna taýarlardy/qyzmetterdi satýdyń tómendeýi, satyp alýshylardan tólemniń keshiktirilýi, qyzmetkerlerdiń shtat sanynyń qysqarýy negiz bolýy múmkin. Qaryz alýshy qarjylyq jaǵdaiynyń nasharlaýyn rastaý úshin bankke tiisti qujattardy usynady»,– deidi Esjan Birtanov.
Qaryzdar kásiporyndarǵa jyldyq 8%-ǵa deiin syiaqy mólsherlemesi boiynsha ainalym qarajatyn tolyqtyrýǵa beriledi. Baǵdarlamany qoldanǵan ýaqytta 536 mlrd teńge somasyna 2 207 ótinim qabyldandy, 1 279 shaǵyn jáne orta kásipkerlik sýbektileri 341,4 mlrd teńge somasyna qarjylandyryldy.
«Joldaýda aitylǵan tapsyrmany eskere otyryp, bul baǵdarlama 2021 jyldyń sońyna deiin uzartylady, ony qarjylandyrý kólemi 800 mlrd teńgege deiin ulǵaitylady. Bul rette, Úkimet «Atameken» ulttyq kásipkerler palatasymen birlesip aiqyndaǵan sektorlarda qoldaý kórsetetin bolady», - dep atap ótti Ulttyq bank tóraǵasynyń orynbasary.
