Mikro jáne shaǵyn biznesti salyqtan bosatqannan keiin el biýdjeti 200 mlrd teńgeden qaǵylady. Bul týraly búgin QR Premer-Ministriniń birinshi orynbasary – Qarjy ministri Álihan Smaiylov aitty, dep habarlaidy QazAqparat.
«Memleket basshysy Joldaýynda mikro jáne shaǵyn biznes sýbektileriniń barlyq kásiporyndaryn tabys salyǵynan bosatý týraly tapsyrma bergen bolatyn. Mikro biznes degenimiz salyq zańnamasyna sáikes 15 adam jumys isteitin jáne jyldyq tabysy 30 AEK-ti quraityn nemese jylyna shamamen 76 mln teńge bolatyn jeke kásipkerler, zańdy tulǵalar», - dedi ol Úkimet otyrysynan keiin BAQ ókilderine bergen suhbatynda.
Al onyń aitýynsha, shaǵyn bizneske 100 adamǵa deiin jumysshysy bar jáne jyldyq tabysy 300 AEK-ke deiingi uiymdar kiredi.
«Bul uiymdar men jeke uiymdar tabys salyǵynan bosatylady. Olar jeke tabys salyǵy men korporativtik tabys salyǵy. Tolyqtai alǵanda, ótken jyly mikro jáne shaǵyn biznesten biýdjetke mundai tabys salyǵy shamamen 190 mlrd teńge mólsherinde túsken bolatyn. Eger biz mundai kompaniialar men jeke kásipkerlerdi atalǵan salyqtardan bosatatyn bolsaq, onda 2020 jyly biýdjet shyǵyny 200 mlrd teńgeden astam somany quraidy. Degenmen, bul shyǵyndardy salyqtyq, kedendik ákimshileýdi jaqsartý esebinen qaitarýdy josparlap otyrmyz», - dedi Á.Smaiylov.
