Foto ashyq derekkózden alyndy
QR Bas prokýrory Berik Asylov Májiliste qańtar oqiǵasynda shabýyldaýshylarǵa qandai jaǵdaida oq atylǵanyn túsindirdi, dep habarlaidy QazAqparat.
7 qańtarda Memleket basshysy Qasym-Jomart Toqaev terrorshylardy eskertýsiz atyp óltirýge buiryq berdi.
«Qurmetti depýtattar! Shabýyldaýshylarǵa oq atý Prezidenttiń áigili málimdemesinen buryn bastaldy. Bul zań normalary arqyly rettelgen. Osy tusta kúshtik qurylym qyzmetkerleri atys qarýyn birinshi ret Almatydaǵy Prezident Rezidentsiiasyn qorǵaý kezinde – 5 qańtar kúni saǵat 16:00 shamasynda qoldanǵanyna erekshe nazar aýdarǵym keledi. Odan soń politsiia men ákimdikter ǵimarattaryna jáne basqa da obektilerge shabýyl jasalǵanda, iaǵni tártipsizdikter kúsh kórsetý satysyna ótken kezde quqyq qorǵaý organdarynyń qyzmetkerleri qarý qoldanǵan», - dedi Berik Asylov Májilistiń búgingi otyrysynda.
Keiin qalalardy qarýly sodyrlardan «tazalaý» kezinde qarý qoldanyldy.
«Demek, shabýyldaýshylarǵa qarsy oq atý Prezidenttiń belgili málimdemesinen edáýir buryn bolǵan. Bul jaǵdai týraly barlyq diskýssiia qoǵamdyq pikirdi ádeii basqa baǵytqa burýda. Is júzinde, qylmyskerlerge oq atý úshin kúshtik qurylymdarǵa arnaiy buiryq qajet emes. Bul týraly: quqyq qorǵaý qyzmeti týraly; Ulttyq gvardiia týraly; terrorizmge qarsy is-qimyl týraly zańdarda tikelei normalar bar. Olar adamdardyń ómiri men densaýlyǵyna qater tóngen jaǵdaida shabýyldy toitarý úshin atys qarýyn qoldanýǵa múmkindik beredi. Dál sondai qaterli jaǵdai 5 qańtar kúni bolyp, 8 qańtarǵa deiin, iaǵni jaǵdai turaqtalǵanǵa deiin jalǵasty», - dedi Berik Asylov.
Tártipsizdikter men odan keiingi tóńkeris jasaý áreketi muqiiat josparlanǵan. «Qańtar oqiǵalaryna» daiyndyq búkil 2021 jyl boiy jasyryn túrde júrgizilgen. Bul jumysty kúsh qurylymdarynyń jekelegen ókilderiniń basshylyǵymen adamdardy jinap, qarý-jaraq, ratsiia jáne kólik satyp alǵan túrli UQT músheleri júrgizgen.
