Búgin Ońtústik Koreia astanasynyń prokýratýrasy Ýlsan qalasynyń merin sailaý protsesine aralasý týraly isti tergeýge bailanysty Prezident ákimshiligi bólimsheleriniń birinde tintý júrgizdi, dep habarlaidy Rionhap agenttigi.
Seýl ortalyq okrýginiń prokýratýrasynan málim etkendei, Prezident hatshylyǵy keńsesindegi tintý Seýlden ońtústik-shyǵysqa qarai 400 shaqyrym qashyqtyqta ornalasqan qalada ótken sailaýǵa aralasý kúdigimen bailanysty.
Tintý jumystary 2018 jyly maýsymda ótken sailaýda Ýlsannyń qazirgi meri Son Chhol Honyń jeńiske jetýine kómektesken sóz bailasý týraly dálelderdi jinaýǵa baǵyttalǵan. Eki jyl buryn Ońtústik Koreia Prezidenti Mýn Chje Inniń jaqtasy Son Chhol Ho «Koreia Táýelsizdigi» oppozitsiialyq partiiasynan sailaýǵa túsken burynǵy mer Kim Gi Hendi jeńgen edi.
Rionhaptyń habarlaýynsha, prokýratýra qyzmetkerleri tintý barysynda Prezident hatshylyǵy keńsesi men jeńiske jetken mer Sonnyń arasyndaǵy bailanysty izdegen.
Burynǵy mer Kim Ýlsannyń politsiia basqarmasyn sailaýǵa birneshe ai qalǵanda ádeii onyń keńsesinde tintý júrgizdi dep aiyptaǵan. Onyń artynda Prezident keńsesi turǵanyn málim etken.
Bul bir aidyń ishinde Prezident ákimshiliginde júrgizilgen ekinshi tintý. 2019 jyldyń jeltoqsanynda prokýratýra jemqorlyq týraly taǵy bir iske bailanysty tintý júrgizgen bolatyn.
