Úkimet otyrysynda QR Ekologiia, geologiia jáne tabiǵi resýrstar ministri Serikqali Brekeshev mineraldyq resýrstardyń ulttyq derekter banki nege iske qosylmai jatqanyn túsindirdi, dep habarlaidy QazAqparat.
«Mineraldyq resýrstardyń ulttyq derekter bankiniń iske qosýynyń sozylýy sebepterine kelsek, «Tsifrlyq Qazaqstan» memlekettik baǵdarlamasyna sáikes júieni engizý 2019 jylǵy jeltoqsanǵa josparlanǵan. Konkýrs tek 2019 jyly ótkizilip, «Transtelekom» aktsionerlik qoǵamy jeńimpaz atandy.
Qarjy bólýdi bekitý jáne merdigerdi tańdaý rásimderiniń uzaqtyǵynan, jobany iske asyrý merzimi 2021 jylǵy shildege aýystyryldy. Byltyrǵy jyly aqparattyq júieniń jumys qabilettiligin testileý birneshe ret ótkizilip, onyń daiyn emestigi anyqtaldy. «KPMG» táýelsiz jobalyq keńsesiniń baǵalaýy boiynsha joba tek 60% paiyz ǵana iske asyryldy. 2,5 mlrd teńge biýdjet qarajaty Qazynashylyq komitetiniń shottarynda saqtalýda. Merdigerdiń mindettemesi oryndalmai, qarajat tólenbedi. Onyń ósimpuly 249 mln teńge boldy», - dedi ministr.
Aitýynsha, biyl naýryz aiynda Ekonomikany jańǵyrtý jónindegi ulttyq komissiianyń otyrysynda atalǵan aqparattyq júieni «Kaznedra» jer qoinaýyn paidalanýdyń biryńǵai platformasy sheńberińde iske asyrý týraly usynys qoldaý tapqan kórinedi.
«Platforma vedomstvoaralyk bolǵandyqtan, jer qoinaýyn paidalanýshylarmen jumys isteitin memlekettik organdar da qatysady. Qazir biz Tsifrlyq damý ministrligimen jumys istep jatyrmyz. Osy jyldyń sońyna deiin platformanyń málimetter bazasynyń qurylymy, interaktivtik karta, qatty paidaly qazbalardy barlaý úshin litsenziia alý biznes-protsesi siiaqty birqatar komponentteri testilik rejimde jumys jasai bastaidy», - dedi Serikqali Brekeshev.
