Atyraý oblysyndaǵy «Teńizshevroil» kompaniiasy aýany lastaýshynyń biri retinde ataldy, dep habarlaidy QazAqparat.
Ekologiia, geologiia jáne tabiǵi resýrstar ministri Serikqali Brekeshevtiń aitýynsha, «Teńizshevroil» JShS-niń alaý jaǵylatyn tehnologiialyq qondyrǵylarynda júieli irkilis oryn alady.
«Kásiporyn tek óńirde ǵana emes, respýblikada da atmosferany negizgi lastaýshylardyń biri bolyp otyr. Alaida, «Teńizshevroil» alaýlarda gaz jaǵýdy jer qoinaýy jáne jer qoinaýyn paidalaný týraly zańnama normalaryna silteme jasap, tehnologiialyq turǵydan sharasyz dep sanaidy. TShO nysandaryna irgeles eldi mekenderdiń turǵyndary alaý qondyrǵylarynyń shyǵaryndylary úshin únemi shaǵymdanady. Kompaniia gazdy eriksiz jaǵý kólemin azaitý, onyń sebebin anyqtaý, gazdy jaǵýdyń barlyq stsenariiine tolyq taldaý jasaý men ony azaitý jónindegi is-sharalar josparyn usynýy qajet», -dedi ministr.
Nátijeler Ekologiialyq retteý jáne baqylaý komitetine, sondai-aq Atyraý oblysy boiynsha ekologiia departamentine joldanatyn bolady.
«Ekologiialyq retteý jáne baqylaý komitetine TShO-nyń jobalyq qujattaryn qaraý kezinde shtattan tys jaǵdailardyń aldyn alý jónindegi is-sharalardy qosýdy qamtamasyz etýdi tapsyramyn. Gazdy jaǵýǵa bailanysty shtattan tys jaǵdailardyń árbir deregi boiynsha Ákimshilik quqyqbuzýshylyq týraly kodekstiń 328-babyna sáikes júieli bolǵan jaǵdaida onyń kózin toqtata turýǵa deiingi sharalar qabyldansyn», - dep málimdedi Serikqali Brekeshev.
Munai óndirý men gazdy óńdeý kóleminiń ulǵaiýyna bailanysty qorshaǵan ortaǵa júkteme artady.
«TShO-nyń qyzmet aimaǵyndaǵy qorshaǵan ortanyń jai-kúii týraly derekterdi naqtylaý jáne jańartý qajettiligi týyndap otyr. TShO-ǵa 1 jeltoqsanǵa deiingi merzimde qorshaǵan ortanyń jai-kúiin barlyq parametr boiynsha (eldi mekenderdiń radioekologiialyq jaǵdaiy, halyq densaýlyǵy, TShO qyzmetiniń halyqqa shaqqandaǵy mólsherlik júktemesi) baǵalaý jóninde ǵylymi-zertteý jumystaryn júrgizýdi tapsyramyn. Júrgizilgen jumystardyń nátijelerin Ekologiialyq retteý jáne baqylaý komitetine jáne jurtshylyqqa usyný qajet, - dedi ministr.
