QR Pralamenti Májilisiniń jalpy otyrysynda «Qazaqstan Respýblikasynyń keibir zańnamalyq aktilerine básekelestikti damytý máseleleri boiynsha ózgerister men tolyqtyrýlar engizý týraly» Zań jobasy birinshi oqylymda talqylandy, dep habarlaidy QazAqparat tilshisi.
Qujatty depýtattarǵa Básekelestikti qorǵaý jáne damytý agenttiginiń tóraǵasy Serik Jumanǵarin tanystyrdy.
«Búgingi kúni elimizdegi básekelestiktiń jai-kúii negizgi taýar naryqtaryndaǵy shoǵyrlanýdyń jáne ekonomikaǵa memlekettiń qatysýynyń joǵary deńgeilerimen sipattalady.
Osyǵan bailanysty, bizdiń jumysymyz jáne zań jobasynyń normalary memlekettiń ekonomikaǵa qatysýmen qandai da bir túrde bailanysty úsh negizgi retteýshi kedergilerdi sheshýge baǵyttalǵan:
Birinshi. «Negizgi qýatqa» shekteýli qol jetimdilik. Bul infraqurylym, resýrstar, olarǵa qol jetkizbesten biznes tutynýshylarǵa qyzmet kórsete almaidy.
Ekinshi. Baǵany burmalaý. Búgingi tańda Kásipkerlik kodekste baǵalyq retteýge jatatyn taýarlardyń 14 túri kózdelgen. Is júzinde ákimshilik baǵany baqylaý sharalary qoldanylatyn taýar naryqtary odan da kóp», - dedi agenttik tóraǵasy.
Sondai-aq, ol jekelgen kompaniialarǵa bilik beretin quqyqtyq aktiler qabyldaý áli tyiylmai turǵanyn atady.
«Úshinshi másele – selektivti qamqorshylyq nemese favoritizm. Bul jekelegen kompaniialarǵa naryqtyq bilik beretin quqyqtyq aktilerdi qabyldaý, memlekettik qoldaý sharalary, ádette, básekelestiktiń allokativti tiimdiligin burmalaityn ataýly sipatta bolady», - dedi Serik Jumanǵarin.
