QR Eńbek jáne halyqty áleýmettik qorǵaý ministri Serik Shápkenov Úkimet otyrysynda Mańǵystaýdaǵy eńbek daýlaryn azaitýdyń joldaryn atady, dep habarlaidy QazAqparat.
«Eńbek qatynastaryna qatysty óńirde 11 myń belsendi kásiporyn jumys isteidi. Jaldamaly jumyskerlerdiń sany – 291 myń adam. Óńirdegi ortasha jalaqy – 353 myń teńge. Aýtstaffing boiynsha qyzmet kórsetetin kásiporyndarǵa monitoring júrgizildi. Óńirde osyndai 44 kásiporyn bar. Onda 25 myń qyzmetker jumys istep jatyr. Jyl basynan beri oblys boiynsha 22 eńbek janjaly tirkelgen», - deidi ministr.
Onyń aitýynsha, jumyskerler qoiatyn negizgi talaptar - munai-servistik kásiporyndarda jalaqy deńgeiin kóterý jáne eńbek jaǵdailaryn jaqsartý máselelerin qamtidy.
«Bul ýaqytta keshendi jospar sheńberinde ministrlik «Samuryq-Qazynamen» birlesip, merdigerge beriletin tapsyrys kólemin 25 paiyzdan aspaityn mólsherde shekteý, konkýrsqa qatysatyn kompaniialarǵa qoiylatyn biliktilik talaptaryn qataitý, konkýrs ótkizý kezinde joǵary jalaqy tóleitin firmalarǵa qosymsha jeńildikter berý siiaqty sharalardy qarastyrady», - degen vedomstvo basshysy 2025 jylǵa qarai óńirde eńbek qatynasyndaǵy zańsyzdyqtardyń 20 paiyzǵa deiin azaiatynyna sendirdi.
«Sonymen qatar, kásiporyndar, onyń ishinde aýtstaffingke qyzmetker usynatyn kásiporyndarda eńbek zańnamasyn saqtaýǵa, jalaqy men eńbek jaǵdailarynda sáikessizdikke jol bermeýge baqylaý qamtamasyz etiletin bolady. Qabyldanǵan sharalardyń nátijesinde 2025 jyldyń sońyna deiin eńbek janjaldarynyń sanyn azaitýǵa, anyqtalǵan zańsyzdyqtardyń úles sanyn 20 paiyzǵa deiin tómendetýge múmkindik beredi», - dedi Serik Shápkenov.
