Olimpiada chempiony Serik Sápiev ataqty boksshy Gennadii Golovkinniń kómeginen qalai bas tartqanyn aityp berdi, dep habarlaidy Sputnik Qazaqstan.
Golovkinniń kómeginen bas tartqan
Serik Sápiev áýesqoi ringte birneshe ret jeńilgennen keiin (kóbinese ádiletsiz) kásipqoi boksta karerasyn bastaýdy josparlaǵanyn aitty. 2008 jyly oǵan qazaqstandyqtardyń súiikti boksshysy Gennadii Golovkin qoldaý kórsetýge ýáde bergen. Ol kezde GGG Germaniiada jattyǵyp júrgen, otandasyn sonda shaqyrady.
"Ol kezde kásipqoi boksqa shynymen de aýysqym keldi, alaida jaqyndarymnyń qoldaýynyń arqasynda kúsh taýyp, Olimpiada chempiony atandym. Kásipqoi boksta ózimdi synap kórgenimde jaqsy bolar edi, degenmen bári osylai boldy, eshteńege ókinbeimin", - dep málimdedi 2012 jylǵy olimpiada chempiony.
"Boksshy" filminiń ideiasy qalai paida boldy?
Serik Sápiev óziniń ómirbaiany negizinde film túsirýdi boks federatsiiasy sonaý 2013 jyly – Londondaǵy oiyndarda jeńiske jetkennen keiin usynǵanyn aitady. Ideiany iske asyrý protsesi túsirilimge aqsha izdeýge bailanysty keiinge qaldyrylypty.
Sápiev federatsiianyń usynysynan bas tartpaǵanyn, biraq kartinany túsirýge qarajat izdemegenin moiyndady. Jobany iske asyrýdy rejisser Aqan Sataev qolǵa aldy.
"Óziniń ómirbaiany negizinde film túsirilgenin kim jaman kórsin. Filmge sinopsis jazý barysynda men óz ómirimdegi faktilerdi aittym. Rejisserler men stsenarister kórermenderge qyzyqty bolatyn naqty suraqtar qoidy", - dedi Serik Sápiev filmdegi jumys týraly.
Sport komitetiniń basshysy akterlik tájiribesi men biliminiń joqtyǵyna bailanysty filmniń basty keiipkerin oinaýǵa batyly jetpegenin aitady, degenmen kadrda epizodtyq rólden kórinýge qarsy emes.
Sápiev filmniń basty maqsaty sportta jetistikke jetýdi armandaityn jastardy yntalandyrý ekenin aitady. Degenmen film ringtegi qan men ter jaiynda ǵana emes. Kórermender keiipker bastan keshirgen drama men mahabbatty da kóredi.
Bastapqyda qazaqstandyq "Boksshyny" 2020 jyldyń shildesinde ótetin Tokio olimpiadasyna deiin túsirý josparlanǵan, degenmen qazir joba qashan iske asyrylatyny belgisiz.
Rejisser Aqan Sataev filmniń basty keiipkerin somdaityn akterdi áli tappaǵanyn málimdedi, stsenarii jazý jumysy jalǵasýda. Boljam boiynsha, túsirilim kelesi jyldyń basynda bastalady.
Sondai-aq rejisser basqa tanymal qazaqstandyq boksshylar, sonyń ishinde Gennadii Golovkin men Bekzat Sattarhanov týraly da (2000 jylǵy olimpiada chempiony, sol jyly jeltoqsanda jol apatynan kóz jumdy – Sputnik) film túsirgisi keletinin aitty.
