Qazaqstannyń Olimpiada chempiondary men ózge de tanymal sportshylary elordadaǵy QR Tuńǵysh Prezidenti-Elbasy kitaphanasyna jinalyp, jeke zattaryn syiǵa tartty, dep habarlaidy "Ult aqparat".
Búgin Elbasy kitaphanasynda dańqty qazaqstandyq sportshylar, túrli sport uiymdarynda tárbielenýshi jetkinshekter men Parlament depýtattarynyń qatysýymen «Qazaqstan maqtanyshy» sport-reviýi ótti.
Elbasy kitaphanasy Táýelsizdiktiń 30 jyldyǵyna orai «Qazaqstan maqtanyshy» atty aýqymdy jobany qolǵa alyp otyr. Joba biylǵy 8 naýryzda «Bolashaq» halyqaralyq baǵdarlamasynyń 30 úzdik túlegimen ótken interaktivti kezdesýden bastaý aldy.
Al búgingi shara barysynda Olimpiada chempiondary men Qazaqstannyń ataqty sportshylarynyń jeke zattaryn Elbasy kitaphanasynyń mýzeiine syiǵa tartý rásimi ótti.
Atap aitqanda, qazaqstandyq mánerlep syrǵanaýshy Elizabet Tursynbaevanyń ákesi Baitaq Tursynbaev álem chempionatynda qyzynyń tórttik salhov jasap, Qazaqstandy álemdik qysqy sport tarihyna qosqan konkiin tabystady.
Serik Sápiev 2009 jylǵy álem chempionatyna kiip barǵan formasyn syiǵa tartty. Grek-rim kúresiniń sheberi Iýrii Melnichenko jeńip alǵan kóptegen kýboktarynyń birin syi etti. Kórkem gimnastshy Áliia Júsipova halyqaralyq týrnirden músinsheni, ataýly medal men taiaqshasy bar lentany tabys etti. Aýyr atlet Ilia Ilin murajai kollektsiiasyn 2014 jylǵy altyn medalmen tolyqtyrdy. Daniiar Eleýsinov mýzeige óziniń «altyn» boks qolǵabyn tapsyrdy. Erkin kúres sheberi Gúzel Maniýrova «jeńisti» trikosyn berdi. Qazaq kúresinen belgili sportshy Beibit Ystybaev 2015 jyly Elbasynyń ózi tapsyrǵan belbeýdi usyndy. Djiý-djitsý sheberi Móldir Mekenbaeva 2019 jyly Mońǵoliiada ótken Aziia chempionatynyń medaldaryn tartý etti. Darhan Nortaev Qazaqstan djiý-djitsý qaýymdastyǵynyń atynan Álem chempionatynyń Kýbogyn tapsyrdy. Sonymen qatar, Qazaqstan baikerler qaýymdastyǵynyń prezidenti Dmitrii Petrýhin óz oljalaryn Elbasy kitaphanasyna ótkizdi.
Is-sharada alyp kúsh iesi, kúsh qoldanatyn nómirler arasyndaǵy álemniń tórt dúrkin rekord iesi, Qajymuqan Muńaitpasov pen Balýan Sholaqtyń murasyn jalǵastyrýshy, QR Mádeniet jáne sport ministrliginiń elimizdegi kúsh mádenietin damytý jónindegi ókili Sergei Tsyrýlnikov ta boi kórsetti. Qonaqtardyń aldynda ol kúsh ónerin pash etip, at taǵasyn maiystyrdy. Keiinnen taǵany mýzeidiń qoryna ótkizdi.
Sport-reviý barysynda sportshylar tapsyrǵan jeke zattar men muraǵat materialdary Elbasy kitaphanasynyń ekspozitsiialarynan laiyqty oryn taýyp, jurtshylyqtyń igiligine ainalady.
Sondai-aq jiyn barysynda QR Tuńǵysh Prezidenti – Elbasy kitaphanasy men QR Mádeniet jáne sport ministrligi arasynda yntymaqtastyq týraly memorandýmǵa qol qoiyldy. Qujatty Elbasy kitaphanasynyń direktory Baqytjan Temirbolat pen QR MSM Sport jáne dene shynyqtyrý isteri komitetiniń tóraǵasy Serik Sápiev bekitti.
